【曾智华专栏】李梓敬与汤家骅

政治圈，不少记者形容近两年闷到抽筋，完全冇乜人或事再值得一提，系咪呢？绝对唔系！
　　
尤其如小弟呢类「传媒精」，若果呢样又话闷，𠮶样又话冇趣，咁就绝对唔适合食呢行饭。
　　
应该点？应该一如讲波佬、讲马佬，明明场马、场波闷到瞌眼瞓，但专业的，不论中外，一定会照旧眉飞色舞，讲到精采无比，如此才算是有料到。
　　
若各位唔知唔识？介绍你赛马日，打开直播，听听廖浩贤点Call马，就知我讲乜嘞。
　　
朝朝打开政治版，点闷也好，仍有嘢值得讲。例如今日我就想「提点」一下李梓敬议员，因佢有件事，不成体统！正是竟然著到非常Casual，T恤杏色裤，普通波鞋，咁就走去中联办庄严的灵堂吊唁，明显与其他人大代表、行政立法会议员的清一色黑礼服，有极大差别。
　　
记者一睇，当然知唔妥，问佢点解。竟然答：「因太迟收到通知，无法赶回家换衫。」
　　
但点解其他议员又得？可能李议员实在太Green，唔知道做高官好、议员好，甚至记者都好，在办公室，必须常备一套得体的黑色套装，以备一Call就「去马」！边有人等你返屋企换衫㗎？真系儍儍哋。结果，出来全不得体！老友，家阵你去向国家前主席江泽民鞠躬呀！
　　
又讲讲另一位行政会议成员汤家骅。佢已脱离主流民主派多年，因思想有变，于是自组另一议政团体民主思路。不过，可能政见有点「唔汤唔水」，结果多次派员出选立法会，全部得个桔，身水身汗仍冇乜支持，零议席。
　　
而佢自己，幸因「旗帜鲜明」，唔使选都可以坐行政会议，凡有法律问题就冲出来「解画」。
　　
搞智库或政党，当然要筹款。民主思路决定明年初办筹款晚宴，并将邀请特首出席，卖枱价十万元至三十万元，掂唔掂？
　　
老友，商界及政界，只讲两个字——现实。所以，民建联筹款，从来唔忧，因大把议席兼阿爷锡晒。民主思路？有点尴尬，从多次选不到立法会，已知⋯⋯今次筹款，将是「一面镜」！