【曾智华专栏】畀教车师傅打

边个畀教车师傅打？（我呀！）几时打？（一九七二年至一九七四年！）喺边度打？（车厢之内！）打边个部位？（打手及打大髀！）有冇报警？（报乜鬼吖，当年文化嚟㗎！）
　　
想起N年前的亲身经历，因上周新闻报道，路试排期时间激增，要等成年先掂。
　　
与我五十年前考试排期相比，时间长一倍以上。如此，若应考者好似当年小弟咁钝，死得！由笔试到路试，分分钟要五至六年才攞到车牌！
　　
点解？因我考咗四次路试才Pass呀，死未？
　　
由先父讲起。上世纪五十年代出生一辈，多冇机会完成中学（更遑论入大学了）。故此，长辈对男生要求——一定要有项求生技能傍身。
　　
其中最简单，起码要攞个车牌。咁，假若冇书读，冇工做，也可以靠揸车揾食（老细车、的士、小巴、货车、巴士⋯⋯）。故此，十八岁生日当天，就敦促立即去运输署排队攞笔试表格。其时小弟家境清贫，老父要负担的学车费，银码不小，当然希望愈短时间成功愈好。
　　
如此情况，对我的压力极度庞大，因明知肥一次路试，就要畀多千计金钱再学再考。
　　
这种心理状况下，中正——压力愈大，失败机会愈高的循环，每次考路试就慌失失，担心肥佬也。咁样点会揸得出水准呢？于是第一次肥泊唔到L位，第二次肥窄路上斜调头撞栏，第三次肥Stop Sign冇停晒就开车。
　　
小弟的教车师傅为一个古肃阿伯，揸咗几十年车，纯熟到单手单脚都揸得掂，故此对呢个死𡃁仔蠢蛋学师，非常不满。
　　
当年的老男人，无论教师、长辈或教车师傅，对男生施以体罚，闲过立秋，也不怕会犯法。
　　
就此，我一边学车，一边畀师傅闹，又钝又冇进步。闹得两闹，发觉转弯唔记得打灯，就一嘢拍落左手，然后应煞停位冇完全停定，就一拳打落大髀。打下打下，打足两年，才终于路试在第四次毕业。
　　
今天重温呢种经历，好难会有年轻人相信，但真㗎，我个驾驶执照，系「打返嚟」㗎⋯⋯畀教车师傅！