【曾智华专栏】唔该早啲中

上周与一位香港著名CEO大M晚饭，佢喜上眉梢话：「碌Sir，终于可以『无敌』喇，正呀！」
　　
佢讲乜？正是早两星期，大M在欧洲公干，有朝喉头痕痒，快测两条线。反正公司大把钱，就在豪华套房内一边遥控工作，一边隔离，七日之后，又一条好汉，可以安全又放心四围飞也。
　　
「其实我呢类人，真系『早中早享受』㗎。N咁多国际会议排到密麻麻，之前成日惊一中招打乱晒大堆计划。如今变『无敌』，起码四个月去边都得，毫无牵挂矣。」
　　
同一道理，小弟并非讲反话或风凉话，真系恭喜李家超㗎。佢完成晒APEC会议回港才中招，Timing真系Fit！因你知我知，今时今日，大部分人都会/要中招㗎啦。与其担心唔知几时中，不如早啲中，好似大M咁，立即变「无敌」，未来几个月放下心头大石，部署乜都得。
　　
一如本报权威评论员杜良谋在《大棋盘》指出，特首今次中招，即可「安全」地展开一连串外访。尤其最重要的，正是十二月上京述职。因要会晤多位高级领导，到时你唔使防人，人亦唔使防你。
　　
推而广之，我见身边朋友，若月底至年底有大型活动的（尤其婚礼），真真忧心忡忡。因订晒酒店，请齐宾客，若一个唔好彩就在D-Day一日前中招，点搞？损失惨重兼累人累己㗎。
　　
呢呢，但假若如今先嚟——你中我中个个中，咁就一天光晒，不用担心，不用靠估啦。
　　
明星骑师一样。十二月十一日举行《香港国际赛事》，争夺总奖金一亿一千万元及无上光荣。呢呢，潘顿就最正啦，又系「无敌」。早前中完，百分百放心。但其他骑师不一样。若唔好彩十二月头中，咁就损失惨重矣。故此，会否个个在祈求——唔该，赐我早啲中，咁「变态」呢？
　　
周三本栏贴士，又再「中规中矩」，指出希威森应该起筷，结果W出两只，且分头不俗。
　　
当晚另一骑师也犀利，正是布文！骑六只，杀出一W三Q一P，全部好分，因暂时未惹飞！
　　
明天老布又「夫卜」，留意三只半冷「星际精英」、「隐形翅膀」及「银亮之风」啦，尤其前者，千四专家，今次会现真身。