【曾智华专栏】你想成功？做八公！

最近与昔日《晨光第一线》的班底叙旧，纷纷提到小弟的「金句」。其实大部分我都早已忘记，不过，当时对住同事（下属）训示，佢哋则声声入耳，不少可能记一世（或嬲一世！）。
　　
例如我最憎人做节目时迟到，因此乃非常不道德行为，必须严惩。做广播，专业基本要求，你必须On Air之前十五分钟坐定定，准备开咪，除非遭逢意外才可饶恕，否则是死罪！
　　
请各位幻想一下，当每朝几十万听众等听搭正及搭半新闻报道时，竟然唔见咗个报道员，有乜反应？觉得理所当然？有冇人会原谅佢早一晚万圣节/情人节饮大咗瞓过龙失场？你系上司，点处理？
　　
其实任何不能有误的行业也一样。例如做港交所、做银行，甚至做马会。投资者及客人，会否容忍一次，只是一次，股票、支票或投注未能准时过户？会否原谅你九点唔开门，因某某职员与男友闹交失眠后唔知醒？
　　
当时我忠告：「各位同事，想迟到？冇问题！唔该你辞职，改做冇王管的艺术家。又或努力令自己成为超级巨星或大老板，可以随意制订自己的游戏规则。人人要跟你揾食又怕咗你，咁就得！」
　　
另外，罗启新最搞笑。佢话：「碌Sir，你记唔记得几十年前，教我哋想做成功广播人，要有乜条件呀？（ …… ）就系要做个专业八卦公呀！」
　　
呀呀呀，记得嘞。这个真理，绝少资深老手会传授新丁或坦白讲，因讲唔出口！
　　
其实你唔「八」，点做传媒？传媒人不用专（因可事事问专家），但一定要「八」。任何公众想知又关乎社会利益的事，你就要「八」回来！大至国家大事，小至政圈人物的花絮，绝不能话我冇兴趣就算数。反之，要锲而不舍，有天生燃烧欲念去发掘市民有兴趣的各种资料发放。
　　
做记者的，更尤其重要有此特质！若冇，请勿入行，以免变成行内的地底泥！
　　
如今香港传媒，根本养不起只走一条Beat的专职记者。故此，你一定要全能，瓣瓣公共政策范围的料，都要识「八」。如此，才有足够痒分畀所属传媒日日落镬！
　　
以前小弟做《晨光第一线》，朝朝主持及监制四个小时节目。唔「八」？扮清高？扮冇兴趣知「无聊嘢」（包括娱乐版的Hot Talk）？咁就Out咗好耐啦，点可长期做「最受欢迎节目」（可能有啲水分！）呀？想博符碌？唔该速速弹开！