【曾智华专栏】黎昭升好鬼尴尬

球场、商场、法庭⋯⋯全皆英雄地，只问赢输，不问其他。总之，就是Winner Takes It All。只见胜者笑，哪管败者哭。马场，更百分百如此！讲到天花龙凤，有几大来头，曾经几威，全部冇用，一切只讲成绩。
　　
睇咗两个月，相信仍然冇乜马迷想落井下石，但起码会问：「喂，点解佢至今仍然冇料到㗎？」
　　
讲的当然是三十出头、在纽西兰被誉为巨星的天才练马师黎昭升。年纪轻轻已扫下当地所有大赛冠军，兼且一连四届登顶。
　　
正因如此，才被香港马会看中，力邀到港开仓。相信管理层早早认定佢应是另一个「蔡神仙」——能人所不能，赢马可以易到似斩瓜切菜。
　　
所以，佢一开仓，即收天价最贵练马费，七万几元，比同是新开仓的伍鹏志高成万蚊一个月。初初看台不少论调：「咁巴闭，收贵啲，值㗎。做马主想赢啫，多一两万元系乜嘢钱？」
　　
好嘞，赛事一日一日过去，转眼跑咗两个月。两个新仓同时有四十几匹旧马。伍鹏志经已赢咗九场，入Q十三场，第三也是十三场。论四甲，足足四十七场，获得奖金一千三百九十九万七千七百七十五元，也赢过杯赛。
　　
黎昭升又如何？都几该煨！只有一场普通头马，三场入Q。论四甲，八场，奖金非常奀猪，只得一百五十万二千五百五十元。
　　
用赛车术语，老黎遇上伍仔！一炼之下，连尾灯都睇唔到，完完全全食尘。
　　
究竟这现象会继续几耐？相信冇一个马迷想黎昭升日日被柴台，柴到零信心，然后黯然引退的。不过，马场乃英雄地，冇人会同情得佢太耐，唯一立即交出成绩，有料到，形象才能翻身。
　　
讲返今日，高班大赛「乐声杯」，应属单打独斗场合。苏兆辉的「健康愉快」火并潘顿的「北极光」。周三小弟指出，潘顿骑告仔热马，一定唔敢古灵精怪开「虫」，又中！贺贤的马也如是。「北极光」上场希威森入P，今场潘顿亲征，一于一W三P扑落去。