【曾智华专栏】尴尬到揾窿捐

任何运动，去到顶级，就是一定要专业，绝对冇人原谅低B行为！演出水准必须符合公众期望。若做唔到，两个字——Get Out！
　　
上周马迷老友疯传一段笑爆嘴片，主角为曾在香港策骑多年的英国骑师郭能（Neil Callan），在英国金顿马场跑大长途三千二百米赛事。
　　
坐骑为大冷门Ballet Blanc，冇乜人会贴佢，反正冇乜机会。不过，竟然上演一场极度荒诞闹剧！
　　
马迷皆知，三千二百米咁长，当然唔会跑一个圈，而是跑两个圈。正常骑法，出闸留住，混入马丛，跑完一个圈后，就占据有利位置，入到直路才发力，最后二百米浑身解数推骑及落鞭，如此才有机会胜出或入位。
　　
呢场，你估郭能点骑？佢竟然好似黐咗线，以跑短途跑法，出闸即大力猛骑。其他骑师当然唔会陪佢癫。结果，第一次入直路，郭能大鞭大鞭杀落Ballet Blanc，搞到只长途马狂奔，结果「大胜」八个马位过终点，然后收慢。
　　
不过，看台之上，个个擘大口得个窿，连走位员都畀佢吓到口窒窒，唔识点旁述呢种「跑法」！只马的力当然第一个圈已用晒，但……喂！场赛事未完噃，要跑落去㗎！
　　
郭能一嚿云咁，直至后面的马纷纷过头，继续向第二个圈进发时，佢才如梦初醒。但Ballet Blanc畀佢狂鞭一段，力度早全部用晒，故进入第二个圈，立即变软脚蟹。
　　
结果，呢场输一百一十五个马位，可能创下「骄人纪录」！
　　
犯上如此低级错误，当然要撼头埋墙认衰啦。结果，郭能从此成为国际马坛「搞笑历史人物」，真系瘀爆玻璃冇命赔。
　　
讲讲上周日，本栏单提供一只「二隽」，小弟本谂住排大外档，加上今季出两次都冇表现（其实扮嘢），应该有得分啩？点知临开闸一睇，冇晒瘾，得四倍，结果仲要跑第二，唉！
　　
今晚又嚟过，提供「顺势而飞」及「精算赤焰」，睇蔡神仙两师徒表演！