【曾智华专栏】伦敦边个会戴口罩？

伦敦边个会戴口罩？
　　
「0+3」之后，涌入香港的游客未见踊跃，仍然滞滞哋。不过，涌出香港的，则如潮水。
　　
这个根本不用大智大慧者，也应可预见，真系街边阿叔都知。例如小弟朝朝茶记早餐隔篱枱位大声公，佢永远对时事弹三弹四，不过，多数有理，只用简单逻辑分析。
　　
例如昨天本栏讲的林郑卸任后竟占用三千方呎办公室，仲要狂花纳税人一千三百几万元，肯定系人都闹啦，吓嘛？
　　
另外，全世界复常，游客去欧洲英国又得，去日本、泰国等更得得得，大部分汇率因美元炒高而跌到一仆一碌，乜都平晒。更重要，唔使搞乜乜物物烦到抽筋防疫。走出户外，又唔使戴口罩，啖啖新鲜空气！
　　
将心比己，你要旅游玩乐，会否拣香港？点会喜欢处处窒住兼成日戴住个焗促口罩？
　　
身边老友最多飞身涌去日本及伦敦。去完日本者回报，五个字——抵玩到飞起！因日圆跌到摊摊腰，但大部分商品及公共交通全冇涨价。
　　
肥B啱啱去完，笑到见牙唔见眼：「大家有几可能够使钱唔使谂者？呢，如今去日本就得嘞，真系花得开心，我去完又去！」
　　
不过，肥B见证一个奇景，日本虽开返关，但完全唔多见欧美游客。满目的，最多仍是香港及新加坡人，边个可以解释此现象？
　　
另外，大状S刚刚伦敦返，又有体会：「唉，香港，揾边个肯嚟呀？我去到伦敦，已完完全全像以往一样自由自在。入境出境，边仲有人要检查呢啲𠮶啲㗎。不过，又不是无人戴口罩，有两类人戴，一为长者，可以理解，保护自己，免受任何传染病感染。但我搞唔清楚的，则是内地同胞，也个个戴口罩，故此，佢哋非常之容易认。至于香港人，当然唔戴啦！」
　　
大状S也指出，在香港看英国，好似乱过乱世佳人，又换首相又个个行业酝酿罢工。
　　
「其实英国人有一套深厚文化，也有自我完善的调节机制，根本毋须过分担心！」S曾在英国求学多年，有充分体会。