【曾智华专栏】赞成/反对请举手

香港人，素来任何事都意见不一。大如国与国政治（中俄冲突、中美较劲、英欧分家……），小如特区政府的防疫政策，永远有不同意见，你想佢哋统一口径？冇咁嘅事！
　　
不过，近日小弟发觉一单嘢，违反上面的常规理论，真系唔多使民意调查，都知几乎一致反对，因个个都问：「喂，有冇搞错呀大姐？」
　　
系乜呢？正是政府花费一千三百五十七万元天文数字金钱，为卸任特首（究竟有乜实质工作必须做呢？）林郑月娥，在太古广场租下一个近三千方呎单位三年，作为办公室（可否公布佢有乜「公」要办呢？）。呢单嘢，至今小弟真系「历史性」，从未听过任何人认为是应该的、支持的。
　　
昨晚大批老友饭聚，自由自在喷口水，当中有退休高官、大律师、医生、传媒高层、政治、人物、商界CEO……讲讲吓，突然有位老哥大声嗌：「各位，今日我哋嚟个迷你民意调查好唔好？（冇人反对）就系究竟林郑「霸」（其实政府安排又或佢自己要求啫）咁大间甲级商业单位，需要花上月租三十八万元！若由我哋十二位江湖打滚N年者衡工量值，大家会点睇呢？我提议，齐齐举手表个态，好吗？（众回应：好！）。嗱，就咁，赞成林郑卸任后需要三千方呎咁大豪华办公室，请举手！」
　　
结果，一只都冇，弹弓手都唔见。
　　
「咁，反对政府花每年千几万元租呢个超级单位畀卸任特首办公者，请举手！」
　　
十二只手，一齐高高举起。呢个迷你民意调查，结果非常鲜明，亦相信极有代表性。
　　
事实，林郑之前三任特首，办公室设在坚尼地道二十八号，物业总面积加加埋埋先系五百三十五平方米，等于每人不足一百八十平方米。
　　
林郑呢？一个人已占用二百七十平方米，比对之下，实在太离谱！
　　
政务司司长陈国基当然要解画，但理由牵强，根本冇人信服。
　　
不过，既已签三年约，算嘞，约满就千祈咪续喇，否则，日日畀人锄就无谓啦