通宵折腾冇嘢出

上周日晚，因翌早照肠镜，故要先行「灌水刑」，全日不准食固体食物，只可喝粥水。到晚上，遵医生吩咐，七点拆一包泻药。十年前食「政府电镀药粉」恐惧未散，今次当然有啲怕怕。幸而私家医生的，是橙味，咁都冇咁惊。一睇产地，咦，祖国货……有得拣咩？
　　
按指示，先沟出零点一五公升，两啖饮晒，冇难顶气味。不过⋯⋯跟住要饮一点五公升水呀！愿唔愿都要顶！心谂，又药又水，两小时后应掂啩？点知⋯⋯大镬！睇住个钟九点、十点⋯⋯肚就咕咕声隆起⋯⋯但毫无便意。然后再十一点⋯⋯十二点，死咯，瞓唔瞓呢？若一落牀就嚟料咪弊？点敢瞓呀？但又的确眼瞓！
　　
结果，死顶，凌晨一点开始仍冇料到，咁⋯⋯睇套戏先啦。三点睇完。喂！有冇搞错，乜泻药嚟㗎，点解完全冇得泻？玩咩！结果，一点五公升水大部分变尿排出。心谂，若如此挨到天光，人都晕啦，点做手术呀？
　　
终于，本来医生叫天光先食第二包药，唔好喇，一于提早四点再开。又系先沟零点一五公升饮清，之后再灌一点五公升水，即前后饮咗三点三公升，死未？顶到上心口啦，若果仍冇，咁个肚会爆㖞！
　　
结果，由第一包泻药开始，挨咗十个半钟先有「万马奔腾」感觉，但已接近清晨，真系吖。
　　
犀利！一系未有效力，一有效力，就似如来神掌发功，惊天地，泣鬼神，连续两小时冇得停，即系搞到天光先有得瞓。
　　
但⋯⋯瞓鬼瞓马咩，九点钟已要到手术室。冇法，唯有又肚饿又泻到脚软情况下，搭住老婆大人扮手杖，召的士到医疗中心。咁款，当然虚弱，好在早知，带多两件衫顶住呼呼声的冷气。
　　
帮衬私家，当然贵，但胜在药水好味啲，私隐大啲，病人衫裤干净啲，手术室也新净啲，当然，护士也温文有礼啲（其实公家的，不少也非常好，但忙到甩辘，难有要求）。
　　
万事准备好，瞓上手术牀，等呀等，等乜？等医生出现「行刑」囉。