唔惊插入最惊灌水

年纪有返咁上下，听医生指示，必须定时验身，包括验血及照呢样照𠮶样。其中大肠癌长踞「杀手榜」一、二位，故个个政府皆忠告市民定期检查，宁愿赞助你嘞，唔该！
　　
点解咁？好简单，若个个一中就涌去公家医院求医，肯定多多资源都顶唔顺也。故此，宁愿津贴你早验早医，咪令瘜肉变成癌。
　　
小弟十年前做过，当时经验，真系好得人惊！得人惊，并非要做入侵性检查，而是手术前要先灌三公升难饮到呕、满是云呢嗱加电镀味的药水。饮第一杯，OK。饮第二杯，仍可以挨到。不过，大佬，每杯半公升，去到第三杯，个肚谷到胀晒，开始闻到杯嘢都反胃，感觉极恶顶。
　　
然后，药威力发作，差不多开始长时间黐住个马桶做人……泻完又泻，泻完又泻，泻完再泻。
　　
呢呢，做直肠检查，最大噩梦，就正正是呢段过程。
　　
然后，基于泻到清而又冇乜可以食，当然成个软晒啦！故此，一定要家人陪同入院，再要著多几件衫，因身体冇热量，顶唔顺冷气也。
　　
十年前做完，感觉太难顶，当然想侧侧膊，避得就避。不过……老友医生个个忠告：「你上一剂有四粒瘜肉，成十年嘞，过晒安全期㗎喇，分分钟复发，点都好过有事才搞㖞，冇咁猪吓嘛！」
　　
谂谂吓，好！死就死，再行多次「刑」啦。
　　
「碌Sir，如今啲泻药，冇咁恶顶㗎嘞。加上唔系政府医院派嘅，味道好好多㗎。不但冇电镀水味，反之有橙味，担保冇你十年前咁难挨，放心啦。总之，跟指示戒口已掂！」老友医生安慰。
　　
小弟虽是退休公务员，但对于医疗福利（其实绝大部分时候与普通市民一样，乜都要排几年），可以唔攞就唔攞，因实在太多人比我更需要。
　　
反正「十年磨一剑」，今次决定重锤啲，去私家医疗中心做可也。
　　
写此稿时，仍未开始灌泻药，但已有点点抗拒。不过，大丈夫，灌就灌啦，死顶一下，如此，三天后，又会变回一条「冇瘜肉」的好汉！