最怕遇上劝人狂

行走江湖，遇上的人有好多种，其中两种最得人惊，也甚讨厌，包括：一、控制狂（Control Freak）；二、劝人狂（Persuade Freak）。
　　
前者多数是上司、老婆、老公、男友或女友，整天在想办法操控你，等你飞唔过佢手指罅，将你一切自由思想、意志及行动「动态清零」。
　　
后者更是乜人都有，包括你的亲人、你的好友、你的点头之交，以至三九唔识七者。佢哋动机简单——我啱晒，你错晒，应该跟我意见去做，一切都是为你好的，请听我指示！
　　
今日集中讲第二类，小弟差不多年年月月日日都碰上，真系若果EQ低啲，也会窒返对方两句：「第一，我做乜，关你叉事乎？第二，夏虫不可语冰，你根本唔知我好快乐；第三，若果我叫你做人唔好咁戆居，劝你跟我一齐『沉沦』会点？子非鱼，焉知鱼之乐呀老友，唔好成日坐喺井底啦，世界好大，好多嘢能令你开心而不枉此生㗎！」
　　
究竟班「劝人狂」最多劝我乜呢？包括：一、唔好投注赛马（玩物丧志㖞！）；二、唔好饮酒（酒精伤身㖞！）；三、唔好叹咁多美食（塞血管㖞！）。
　　
冷静观察，班「劝人狂」冇乜边个好似小弟咁，生活得又快乐又充实，因乜都担心一餐，成日自己窒住自己。兼且非常「夏虫」，完全唔知马迷从赛马中获得无穷乐趣外，更行到边都见到自己善心结晶——马会捐献。极有满足感！
　　
另外，真替唔识饮酒者无奈，佢哋根本冇机会欣赏到酒的艺术（当然适量而不过界！）。
　　
刚刚睇到英国一则新闻，笑死。一对过百岁夫妇，七十五周年钻婚，公开指自己咁长命，夫妇关系咁好，正因每日一齐喝酒！哈！
　　
班「劝人狂」，系咪应该开始学下饮酒呢？
　　
嗱，今晚小弟与几十万马迷又「玩物丧志」，通过投注行善喇！
　　
一于买黎昭升再变魔术，「合伙芙蓉」、「星之宝」及「闪电侠」，每只十蚊鸡W！