马亲还是BB亲？

男性父亲马主，你估佢爱佢BB多啲定爱驹多啲呢？可能个个不同。但以小弟观察，十个男马主，十个银包内或手机内，最少有一至N张爱驹照片，遇到生张熟李，都会成个「慈父」咁款四围Show，真系百分百「父爱」满溢㗎。
　　
尤其马匹未抵港时，更会充满期望及大计，例如摆边个马房、畀边个骑、专攻乜途程、终极目标跑乜大赛……等等，如数家珍。
　　
事实，小弟虽冇养马，但也极愿意分享老友的喜悦，正如喜欢分享老友做父亲的喜悦。当然，更望佢哋赢马，到时大事庆功搞庆祝会，朋友必可尽享口福，你话几正呢。
　　
早前小弟在此问：「喂，究竟黎昭升有乜Quali，可以收到全港最贵练马费用，每月要七万几元呢？贵过晒蔡神仙、告仔及罗富全噃！」
　　
之后老黎安排旗下马出赛几次，只得周三一W，究竟是否练有所值呢？
　　
终于老友「马主L」拆解疑团：「碌Sir，其实佢第一个月收得贵，合理㗎。因接手一个新马房，乜都要重新买过，又要添置新设备，简单讲，垫地的报章及禾秆草都不能用上手的啦。所以，第一个月费用贵，有啲误导。过多几个月，应该收费会降低㗎喇。至于有冇料到，好难从接收的旧马看到。十一月后啦，当佢亲自选购的子弹运到，就见真章㗎嘞！」
　　
讲新运到的子弹，另一位老友「马主F」，有匹级制猛料快运到。在外地两战两W，到港时会评六十三分，放吕健威马房，目标鲜明，先跑几场加分，然后攻三级赛，若得埋，当然希望在一级赛中大放光芒。
　　
得唔得？要睇。不过，一众老友已摩拳擦掌做定老西，到时入场呐喊。
　　
呢呢，赛马乐趣，正正在此！
　　
明日二级赛，「加州星球」唔会出嚟输。但让磅赛，最宜偷鸡！买多少「嘉应之星」及「勇战神驹」啦。尤其前者，同属东厩，入脚已经好好分。
　　
第九及第十场，我会买「自胜者强」及「魅力宝驹」W二串三，两皆蔡神仙宝藏！