你凭乜收咁贵？

香港人不少心中有把尺，觉得若达到某个目标，就算「成功」嘞。
　　
当然，有人较市侩，以财富计，例如十亿元身家。有人以是否读到博士、做到教授计。有的则希望「挨」到个太平绅士衔。较普遍的，是成为乜会乜会会员，例如游艇会、香港会、乡村俱乐部、高尔夫球会或马会等。
　　
当中又有一种身分几特别，是马主（喂，并非十几二十人夹𠮶种噃），一个人拥有一只或数只马。
　　
有乜咁巴闭？即系你经济好掂也。因买一只马，好耐以前已经百万元计。然后，每个月几万元养马费。唔掂点搞？想充大头鬼？行开啲啦！
　　
老老实实，经济好时，楼升股升，鱼翅捞饭的日子，对不少富豪来说，几万蚊，湿湿碎。不过，花无百日红，过去三年，大市环境几差，香港人边个唔知？
　　
正如唐英年讲：「不少行业在吊盐水，在阴干，再唔开关，好多就会断气！」
　　
普遍财富萎缩，收入大减。不过，若你养只马，费用有冇得减呢？不但冇，反之年年加加加！最新马会发出的各厩「平均练马费用」（即不包括N种药物、运费、特别饲料、报名出赛……），已涨到由五万二千七百八十四元（文家良）到七万二千三百五十八元（黎昭升）。究竟如今香港地，有几多人顶得顺？呢下真系变咗身分象征嘞。
　　
小弟最好奇，究竟黎昭升凭乜收咁贵，竟然多第二位蔡约翰七千几元？或许当佢有马出时，就可揭晓了。
　　
不过，睇收费表，最「物有所值」是告东尼（五万七千四百四十一元）、姚本辉（五万七千四百九十四元）及沈集成（五万九千一百二十八元）。若有马，我会畀佢哋操。
　　
讲完练马师讲骑师，明日再次冇莫雷拉。佢跑咗两日，好明显唔多妥。包括冇斗志、冇狠劲。场场最后二百米已经手部放软（请重温巡逻影片），肯定有事。健康大过天，未搞掂，千祈咪再上阵！
　　
明天三级赛，「加州星球」热爆！一于用佢做二重彩复式胆，十蚊注食全餐可也！