粉岭高球场之争

粉岭高尔夫球场之争，一拖数年，睇个款，将会继续拖落去，陷胶着状态。
　　
原因？保留现状派（背后大量香港有权有势「高等人物」不停发功，招招有伏笔！）实力唔简单。至于建公屋派，也咬住唔放，因香港公屋严重不足，加上上届政府已定下难以抹去的政策，好难令这个议题消失。
　　
过去几个月，不停有人问小弟点睇？企边面？我根本唔会企一面咁戆居！讨论问题，应由客观分析出发，一旦「企埋一面」，点理性呢？
　　
相信香港不少人也如我，不打高尔夫，冇兴趣之余，亦知此乃「贵族活动」。想排队入会？下世都未轮到，根本唔使谂，故从未有任何幻想。
　　
事实，理论上粉岭高球场存在与否，与九成香港人冇切身关系。
　　
不过，若大家去过此球场，一定会赞成，真系好靓，设计好有品味，不少天然生态，在此才可以揾到，日日夜夜都见罕有生物出现。为乜要摧毁一个如此有历史价值、有生态价值、有优美设计的球场呢？
　　
你唔好话畀我听香港冇地！香港大把地！如今发展咗的，只三成。要起楼，可以「释放」大地产商控制的大量地皮、可以加速市区重建、可以放宽丁屋高度、可以移动郊野公园边陲⋯⋯真系N咁多方法，千祈咪畀利益冲突声大大误导！佢哋个个属私人地皮利益「持份者」，当然会生霸死霸拥有的权利，唔逼唔妥协。
　　
唔好「屈」人仇富，事实粉岭高球场由始至终皆只得一小撮人霸住「独家享受」。小市民若非近两年的争议，想入去行吓？发梦冇咁早！
　　
呢呢，如此状态，正正孕育出——反正我都冇分，拆鬼咗佢建公屋又如何，好过唔公平地变特权阶级专利的心态。
　　
试想想，若粉岭高球场系维园、香港公园、纽约中央公园、伦敦的海德公园⋯⋯的话，有冇人敢动议铲平佢，起私楼又或起公屋？讲吓都成「城市市肺罪人」啦！
　　
要保住高球场，最佳方法，立即将佢变共同拥有的空间。