孤寒老板好好玩

「传媒老是佛慈善夜」，各人轮流上台大爆特爆，不少内容笑刺肚皮，既然无伤大雅，部分可以公开。
　　
话说一直以来，个别电视台老板级人马，非常精打细算，即系乜？即系孤寒及小家呀！佢哋作风，与电视台播出节目畀人的感觉，非常两样。电视大骚，全部金碧辉煌，搭个景都好似有使唔完的钱。实质呢……当然唔系！
　　
大家耳熟能详的，是昔日A记老板限用厕纸及关电梯悭电笑话。
　　
原来B记赚最多钱时期，也不遑多让㗎！其大管家著名数口犀利，惯性日日周围巡。有日黄昏，站在停车场望上三楼，咦……唔……即Call总经理：「为乜同事咁嘥电，未黑齐就开灯？」
　　
老总唔敢驳，速速查。哎吔吔，原来电视台灯有自动掣（似街灯），一到光度不足就会自动开，就咁简单。不过，既然大管家唔Likey，老总亦无谓解释，速命技工再调黑点才自动着灯可也，当然，员工个个MM声啦。
　　
大管家试过巡录影厂，哗，大剂！又畀佢揾到有人浪费嘢。原来木工通常拆景后，铁钉随处掉，等清洁工清理。大管家行过，有如发现「新大陆」！逐颗可再用的钉执呀执，放入鸡皮纸袋，跑到总经理室，掟在枱面：「X总，你睇吓佢哋几大嘥？呢包钉，绝对可以再用！快下令！」
　　
老总唔识笑。唉，大管家几十亿元身家，搞埋啲咁细眉细眼嘢，真系……况且请人执钉再选出完好的，你估唔使人工乎？
　　
又一次，A记老板见记者时，窒大管家两句：「我哋蚀钱，因同事不似B记大管家咁，连五仙使费都𥄫到紧，所以……」
　　
记者如实报道。
　　
翌日。B记开高层会议，大管家摊开报章，指住段新闻。起初一众高层以为佢会发火，点知唔系，反而好高兴话：「哈哈哈，A记老板都儍嘅！话B记赚钱因我连五仙使费都计较？错错错！你哋个个知，其实我系连一个仙使费都计较，哈哈哈，佢仲话学人做生意？蚀死佢呀！」