国际城市理应国际化

时Fit时肥的马时亨，滞咗在香港两年多后，终因工作原因，放「疫监」，大飞特飞，又飞欧洲，又飞亚洲，难得返嚟后个样冇攰不止，更神采飞扬，四围揾人分享所见所闻。

总结五个字——香港好大镬（纯粹小弟加盐加醋演绎）。

首先，香港本来为一个蜚声全球的国际城市，亦是中国唯一的国际金融中心，但就因一个疫情，推出的政策，搞到自断两臂，冇晒竞争力！
　　
须知全球国际大城市分分秒秒在互炼中，最好你唔争气，放软手脚大堕后，咁我就可以一声唔该，先抢钱财，再抢人才。然后将抢回来的落地生根，开枝散叶，等佢哋子子孙孙长远移居，在地发展。香港以前最大优势，为一切自由。外国专才来到此处，享受高薪低税，处处美女美食，兼且子女教育绝
冇问题，大把国际学校，简直天之骄子。

如今是怎么的一个样？大家有认识走咗或还未走的外国雇员，问吓啦。唔识？也可问吓任何做国际生意的朋友，肯定满口苦水，一五一十话你知，香港几咁大镬。

其他自由处处萎缩，唔讲嘞。但出入境自由，真系缩龙成寸，对好多雄心勃勃想替香港打拼者，有非常大挫折感。
　　
难怪个个问：「全世界都开晒，欧洲北美、澳洲亚洲，特别我哋对手新加坡，已回复疫前的自由出入状态，人人可戴可不戴口罩。点解佢哋得而香港唔得？国际城市而唔系国际化，咁点竞争？又点为中国最大利益——吸外资，扮演积极角色？真有这个长期『自变疫埠』需要吗？」

一日一万几千宗，听落好多。欧洲、日本、韩国……何尝不如是？感冒也会肺炎死人，会否牺牲成个城市的经济及前景，去作无休止缩呀缩㗎？

总的一个「主体问题」就是：点解人哋开得，我哋唔得？
　　
肥马好肉紧话如今的防疫政策一定要改，不少专家也早早不停猛呼吁。老友，若果以国际赛马论香港，唉，已经只只入晒直路，但我哋仍在闸前踱步！