古天后日志｜港股表现反复 21000水平短线支持

7月7日，大致多云，间中有骤雨，局部地区有雷暴。隔晚美股表现继续反复，联储局嘅6月份会议纪录，重申对抑制通胀嘅决心，不过市场对此反应正面，美股由跌转升，虽然早段道指曾跌逾百点，但至中段做好，收市升69点；标指跟纳指则分别升13点及39点，已连升三个交易日。

美国联储局周三公布上次议息会议纪要，指该局官员认为通胀前景恶化，因此有理由喺7月议息会议上，加息50点子或75点子。议息纪要称，目前通胀远高于联储局长期目标，通胀率降至2%可能需要一段时间，而如果通胀高企状况持续，「更具限制性的」利率水平系可能发生嘅。

美股暂时无乜方向，都系升升跌跌，不过大宗商品价格，油价及金价近日走势，反映市场对经济衰退嘅忧虑。但正因呢啲产品价格下跌，令通胀有所缓解，呢个亦系近日美股靠稳嘅原因。不过美国10年期债息喺大量雄金流入强劲美元下而重返3厘水平之下，呢个现象似乎有啲奇怪，喺债息回落至只有2.75%水平之际，按正常情况资金唔会有兴趣抢购美债，呢啲唔寻常嘅状况，令到美国资本市场走势，变得更唔明朗。

至于中港股市呢边，虽然有传闻指美国喺短期内，甚至最快喺本周会取消部份对华关税，但港股未有借呢个消息向上挑战22500水平，反而高开低走，出现连续两个交易日下跌，甚至先后跌穿10(21811)、20(21544)及100日(21541)移动平均线。

可收集几只重磅指数股

自港股喺上周完成期指结算，月结及半年结后，假期返嚟走势偏软，恒指从22449回落至21500水平，回吐幅度近千点，主要系中概股喺美股呢两晚表现均强差人意，拖累港股呢边嘅重磅科网股市走软，呢批科网股都系恒指权重股，佢哋无运行，咁港股自然亦脚软。

古天后一再强调，港股转势言之尚早，坚持港股目前仍然处于上落市格局，事实上大市重上22000关之后，未见再有大量资金涌入，向下调整亦系必然嘅事。不过大市自3月中成功寻底后，每次反弹回吐，底部一次比一次高，预计今次由22500水平回落至20800至21000水平，调整幅度已足够，喺21000水平左右，可以收集返几只重磅指数股，190元楼下买美团(03690)，240元附近买京东(09618)，若然指数要反弹，优先关注呢两只行得较快嘅重磅指数股。

古天后

(徐狄怡，证监会持牌人)