独家丨尹光被指硬推入「男歌手」五强做「反镜」武器 懒理口水战：钟意讲乜就讲乜
唱了60年歌的尹光（光B），凭住AI版尹光《一人之境》、《Dear My Friend,》等歌，获歌迷推入商台「叱咤我最喜爱男歌手」5强，79岁才「处男」下海跟卢瀚霆、姜涛、陈卓贤及张敬轩争奖。对于被捧成大热引发口水战，有人撑亦有大量反对声音，光B自爆1月1日前都会「蒙着眼睛」唔再睇留言，已买定战衣靓仔现身颁奖礼的他对攞奖表示随缘，坦言：「畀我咪要，冇求过就唔会失望。」采访：方骞平 摄影：谭志光
受到年末商台《叱咤》全民投票的相关搜寻带动，尹光首度打入「搜寻人气榜2023」十大，人气高企。不过，光B对此蒙查查，他轻松自在说：「佢钟意排我第几就第几囉，又唔系我排，我冇乜所谓。」
岁数差距大冇得斗
光B杀入商台「叱咤我最喜爱男歌手」5强，有指网民硬推他成「反镜」武器，亦有指尹光得奖，会玩烂个奖，尹光对被狙击完全唔上心：「都有人话我唱得鬼咁好，网上评论有好多，有弹有赞，初期都有留意，但越睇越乱，乜都唔知系最好，所以就唔再上网，佢哋钟意讲乜就讲乜，唔好上心，因为曹操都有知心友；关公都有对头人，要全部人钟意你好难，尽量争取时间休息好过。」他强调自己一向不着重奖项，只重视唱歌：「因为希望越高怕跌落嚟会受唔住，我都冇求过就唔会失望，所以颁奖礼前夕一啲都唔紧张，紧张就会有压力。」当问到系咪想攞我最喜爱男歌手」时？他并冇掩饰：「想就个个都想嘅，随缘囉，畀我咪要，(攞到算老怀安慰？)老怀一早有，79岁都叫安慰啦。」但他又补充：「我同班后生边有得斗呀？大家岁数距离咁远，佢哋仲有大把前途？我哋已晚年仲争啲乜啫？争到健康已好好，我最重要系健康。」曾有指乐坛欠他一个奖，光B指自己得过好多奖，只系唔记得系乜奖。
低俗咸湿突然升格
多得AI版尹光，光B多人留意咗，尤其系年青人，不时在街上被疯狂「集邮」。问到跟张敬轩同Level出战叱咤的光B，自觉现时在乐坛地位时，他谦虚笑说：「人哋系阿公，我只系小B，就算佢好似广告中讲想做返轩仔，阿仔都大过阿B啦。」光B形容现阶段都算由乐坛低层「升呢」到中上层，又不忘幽自己一默：「以前啲歌被视为低俗咸湿，𠵱家竟被指高级好听，其实咪又系一鬼样。」语毕光B抛出金句：「所以『话你唔好，唔好嬲；话你好好，又唔使咁开心』做人要平平淡淡过，《Dear Myself》歌词都有得唱『我唱着无无聊聊从未太闪耀』，因为自己冇叻过，只系唱歌唱得耐，多人识啫，当然多人识咗梗系有少少开心，年尾一口气接咗20个广告，连接Job价都高咗2至3成，但唔好讲钱，明年80岁想回馈社会搞个慈善骚，自己一个仙都唔收。」
登台失声全程「咪嘴」
另外，光B在《万千星辉贺台庆2023》独唱《Dear Myself》及半首《大笪地》，被网民质疑「咪嘴」唱歌，光B理直气壮表示歌曲熟到烂唔使「咪嘴」，但就唔反对「咪嘴」：「『咪嘴』都系𠮶个人唱啫，最重要好听，有时跳得劲会有喘气声。」他指做歌星好惨，遇上失声要打开声针会好伤身，作为观众都唔想歌星咁辛苦，就算间中咪两只歌都好闲。他又自爆曾失声，在外地登台时咪足全场，但观众一样唔介意，仲睇得好开心。