独家丨张国荣被狂迷爬树潜入睡房机警拆掂 34年忠粉分享偶像甜蜜惊险秘史
一代巨星张国荣(哥哥)离世20周年，昨日有行内人向本报公开尘封20年的哥哥绝密娱圈趣事，今日就有贴身追随哥哥34年的忠粉Ann Ting，细诉跟偶像的相处点滴，以及从哥哥口中得知，只有至亲才知的私密事，并非农场式翻炒旧闻绝对珍贵，包括曾有痴情狂迷，用尽方法想得到哥哥注意，发喜帖公布同张国荣「婚讯」;另外，哥哥昔日位于加多利山布力架街的故居，原来曾试过被失常狂迷从后门爬树成功潜入屋，更坐在牀边等哥哥，好恐怖呀！采访：方骞平
《头条日报》的资深娱记提供两张34年前亲手影的私藏靓相，畀哥迷重温哥哥昔日风采。相片摄于1989年2月，当日记者相约哥哥到浅水湾影贺年相，已是天皇巨星的哥哥打扮到靓靓仔仔现身，仲有求必应，拎完大炮仗又吹风车，拍摄期间更温柔地命令记者:「拎个袋畀我。」据记者形容该装满贺年道具的胶袋都相当唔美观，但哥哥都拎咗一阵先转手畀身后的男助手拎住，劲有风度，呢啲就真系无明星架子嘞！哥哥对传媒体贴又有礼，亦是其成功之道，𠵱家啲艺人真系要学吓嘢喇。(编按:极葡萄)
哥哥唐唐分房瞓
其实哥哥唔止对后辈及记者好，亦好爱锡Fans。贴身追随哥哥34年的忠粉Ann Ting更成为哥哥的倾诉对象，阿Ann经常于片场及哥哥惯常光顾的Coffee shop出现，大家会闲话家常，由电影讲到生活锁事：「印象最深刻当年哥哥同我讲过，对正佢二楼睡房出面有棵大树，竟然有女歌迷爬树，再神不知鬼不觉咁由窗口潜入佢间房，完全无惊动楼下嘅家佣、司机及唐唐(至爱唐鹤德)。直至当晚佢返房，一开灯就见到有个女人坐喺佢牀边望住佢，两人对望时哥哥吓到心都离埋，只能装作镇定，一方面安抚住对方，然后设法逃离现场。」
阿Ann形容哥哥向她自爆「狂迷入屋」事件时，虽然犹有余悸，但都讲到眉飞色舞，描述时还添上几分刺激感，凸显佢可以好机警咁面对危机处理，招积得嚟都几好笑：「哥哥话，佢吓一吓之后，就𠱁住对方，答应同佢结婚，仲追问对方『你叫乜名？』、『我送你落去搭车呀！』边讲边退到房门口，哥哥即九秒九跑出房再闩埋门，然后大叫家佣及司机挟对方离开，但哥哥真系大好人，佢冇报警。经此一役，马上赶工加装窗花，唔使长期提心吊胆。」另外，据知哥哥跟唐唐同居时是分房瞓，佣人亦要经哥哥批准才能入房打扫。
PatPat靓过梁家辉
另外，Ann还透露，哥哥有幽闭恐惧症好惊搭电梯，所以唔like住apartment外，都几怕跟陌生Fans距离太近：「约翰连侬（John Lennon）被疯狂粉丝枪杀(1980年12月)，佢都惊俾Fans伤害，划花佢块面…所以喺公开场合，会默契地畀铁粉靠到最近，帮手做埋保镖。」哥哥要求Fans斯文有深度，会同佢有互动讲吓电影，而唔系做「花痴」：「所以我见佢前，即使未睇过套戏都刨定影评，最记得佢同我交流梁家辉主演嘅电影《情人》，佢问我『你觉得家辉个pat pat靓唔靓？』正当唔知点应佢时？哥哥自问自答话『咁我个pat靓啲…』好搞笑。」另外，搞鬼的哥哥亦曾在Ann面前整蛊唐唐，「佢讹称自己派晒手头嘅利是，叫我哋揾唐生𢭃利是，吓到怕丑嘅唐唐不知所措，佢用尴尬而不失礼貌嘅微笑答『利是？有有有…』语毕就系咁摷，在旁嘅哥哥目击唐唐嘅反应，笑到卡卡声，好Sweet。」
《星岛头条》APP经已推出最新版本，请立即更新，浏览更精彩内容：http://www.stheadline.com/