即時娛樂
2023-02-02 19:21:29
星8卦｜「平嫂」嫁偶像粉丝变老婆 痴迷成狂成屋都系佢老公
新春大吉，无嘢好做，难得「平嫂」叫到，𠮶日就去咗佢同老公间别墅开年，顺便派吓利是畀两位小宝贝。老公系边位？劲㗎，讲出嚟无人不识，仲好鬼红，有华人地方就有佢啲粉丝。
平嫂同老公经历好多，呢段感情好真挚，大家都知平嫂本身系佢老公超级大粉，但爱到咁癫狂，真系要行入佢哋嘅爱巢至深切体会到。
一入门口就见到电视播紧老公演出嘅电影，一套接一套咁播，平时已经日日播住，咁啱呢晚大家带咗啲小朋友，我就提议唔睇电视播啲音乐啦，哈，平嫂就开始播老公啲经典金曲，一样非常洗脑，听咗成晚，脑入面到依家仲系𠮶啲歌词，由唔识变到背得出。听到闷行去厨房揾嘢饮，打开雪柜，哗，见到嘅都系佢老公代言嘅饮品，最最变态系乜呀？后面有啲唔系老公代言嘅，平嫂就好鬼马咁全部贴晒自己老公个样上去，佢咁有心思又咁得闲，大家真系估佢唔到。
至于平嫂派嘅利是，仲驶讲，全部自家印制，系老公嘅唛头，总有一封派俾你。咁都唔厉害，全晚你讲咩话题，平嫂都可以拉到落老公嘅范围，简直系天下第一小迷妹，突然之间明白点解佢老公要拣呢位大缆扯唔埋嘅女人，因为无一个男人唔享受俾人痴迷崇拜，系世界最重要嘅感觉，平嫂，你好嘢！
【相关文章】：