独家丨34岁陈俞希想同强尼演师生恋：我可以扮学生㗎 ViuTV一哥一姐争取演戏机会操肌学唱歌
强尼和陈俞希（Hailey）贵为ViuTV一哥一姐，虎年因疫情致发展未如意，不过两人好知足。展望兔年，近期狂操肌的强尼和努力学唱歌的Hailey ，会努力争取更多演戏机会，两人更希望继《暖男爸爸》后再合作演戏，Hailey更提议和强尼大玩师生恋。采访：杜杜 摄影：罗安强 服装：Suncoo hk(Hailey) 场地：Studio Meta
Hailey同强尼觉得去年眨吓眼就过，前者去完欧洲拍摄《食得怪先好嗌》后，下半年似白过，「好似啲新人开始做啲新节目，得返我哋两个老嘢喺度咁，哈哈！」讲到老字，强尼即否认，「你唔好咁讲，你系咋我唔系㗎！我好有年青活力㗎！哈哈！」
发展其他兴趣同事业
两人有时间就发展个人兴趣及生意，如Hailey就搞网上食品生意「八婆会馆」卖盆菜及大闸蟹等，仲学唱歌及考获唎酒师资格，「我成日塞到自己个期好满，咁样充实啲，上堂时好期待攞成绩表，好似考唎酒师时，寄咗成绩表嚟，自己唔敢睇叫人帮我睇，好惊，感觉好似返番学生时期，好有趣。」
强尼竟要提醒才记得去年曾推出首本著作《强尼：从我遇见的人-拆解真实自己》，以及与吴海昕及梁钊峰合演的音乐剧《二人餐》，他笑言：「因为呢啲同钱冇乜直接关系，哈哈！个满足喺心里面会唔记得咗。」强尼对两个作品都相当满意，演音乐剧的过程更令他如参加《全民造星》般热血，「如果我仲后生，唔使谂会参加《全民造星》，唔系想赢啲乜嘢，系个过程好珍贵，同一班人一齐经历一啲事大半年，用两个礼拜去砌一个表演，赢输都好，但我唔能够再参加𠮶啲比赛，不过呢几个月同班人去排戏，再做10几场，每场抱住好期待心情面对唔同观众，喺我呢个年纪都做紧类似嘅嘢都几好。」
互相鼓励出写真集
讲到兔年愿望，正在努力学唱歌的Hailey就解释只为装备自己，未有想过当歌手，但公开表演都有信心应付，「有得畀我练都可以嘅，唔好突然听日叫我唱。」不过相对唱歌，她更渴望演戏，「我希望啲人谂起我嘅时候，会谂起演员呢两个字！casting对我嚟讲都系学习，如果啲人打畀你叫你去casting，唔理角色大定细，喺佢心目中你都做得吓戏，或者你适合呢个角色，所以我嘅愿望系人哋当我系演员。」
之后Hailey主持上身，追问强尼最近频频健身操肌原因，仲搞笑话：「你操咁大只，希望出书呀？我都想欣赏！」强尼反击做过𡃁模的Hailey，「如果我出写真集要叫你师姐啦！参考吓你啲甫士。」仲狂鼓励对方再出写真集，「当年佢啱啱出道，我𠵱家真系叫佢再出，一定好过𠮶时，呢个访问出咗街，下面啲留言一定会话出出出，𠵱家佢多咗阵韵味。」
期待有意想不到机会
强尼解释操fit除了为身体健康，也为未来工作做准备，所以除了健身，亦有学唱歌和演戏，「我未必会定个好明确嘅目标畀自己，上完呢个班会得到啲乜嘢，有时间咪畀自己锻炼。」问他若有角色要求骚肌肯唔肯呢？他大方话：「求都想求做一啲咁嘅角色，难得畀佢推动，但唔系咁易有啦！」讲到新一年工作目标，他透露下半年有机会再演舞台剧，仲想多拍剧，「我希望有啲意外嘅嘢，好似旧年我哋突然拍《恋爱staycation》，拍得几开心。」
新一年强尼好希望跟Hailey再合作拍剧，「《暖男爸爸》𠮶时我哋唔系拍咗好多剧，过几年可以喺戏剧上试吓唔同角色关系，我哋两个都恨拍剧，有任何角色有得玩都会好开心。」Hailey即问他：「你想演咩关系？」听到强尼话冇所谓，34岁的Hailey就提议，「师生囉！我最近睇紧师生剧，你做老师，我可以扮学生㗎！」49岁的强尼笑言：「sorry！忍唔住笑咗！」Hailey没好气话：「我提议吓畀公司啫！哈哈！」
新网站 www.stheadline.com 已推出