乔宝宝再做爷爷添孙女 勒令两年抱两新抱暂时封肚：我屙屎都冇时间

乔宝宝嘅大仔「印度豹」系孝顺仔，知道爸爸定居苏格兰过住半退休生活最恨系抱孙，所以同老婆启动「造人」大计，去年8月30日，乔宝宝新抱顺产诞下7磅重儿子Khalson (乔孙孙)，乔孙孙𠵱家16个月大，正牙牙学语，超级可爱，乔宝宝每日凑孙仔超过10小时都唔嫌攰，十分Enjoy。

孙女改名乔爱美

乔宝宝今日再报喜，新抱仔喺当地时间12月3日再成功追多个女，为乔家凑够个「好」字！宝宝开心到不得了说：「我送祝福畀佢哋，够㗎啦！我仲帮佢改名为Aria，中文名系乔爱美，配衬返Funny GILL family。」当问到会否要求儿媳再生B时？他竟落令叫新抱仔暂时封肚，大笑说：「最快要隔一个生肖(12年)先好再生B呀，因为『印度豹』两年抱两，佢经已冇得畀我唞，我连屙屎都冇时间，𠵱家有个好字咪算囉，够喇！哈…」而初生孙女乔爱美轮廓激似哥哥乔孙孙，如同饼印一样，好精灵。