独家丨林利年过半百唔想离婚孤独终老 用爱「教」好老婆承诺房事会尽力
56岁的林利和台湾模特儿太太陈贞均（Erin）结婚3年，今年8月，林妻因不满林利拒行房，呃食呃住等玩公审，林利当时直认「已经没有爱，何来性？」，婚姻一度亮起红灯，最近两公婆就去咗泰国旅行箍煲再渡蜜月。林利接受《头条日报》独家访问时表示会包容及珍惜老婆，坦言年纪唔细，「打打杀杀好攰」，记者见证佢访问期间不断报告行踪，当事人好享受更坚称生活好开心，因为「几十岁人仲咁靓仔」，最后仲话房事上会尽力，咁咪好囉！采访：方骞平 摄影：朱伟彦
林利到泰国前曾撇低老婆，「一枝公」低调返港拜祭亡母，顺道相约张伟文经理人方俊茶聚：「呢两年多发生咗好多事，系我一生中最逆境嘅时候，除咗患重病，亲人(妈妈)走埋，朋友就系我嘅精神支柱，有咩委屈会去海边叫吓，揾朋友呻吓。」
扮瞓觉扭转婚姻危机
当日林利喺短短两小时多嘅访问中keep住同老婆联络，传文字、图片讯息都唔够，还要视像通话两次报告行踪，甚至向老婆介绍身边人，包括记者。𠵱家两公婆关系，由水沟油变返糖黐豆。他主动交代婚姻状况：「我哋已经冇乜事，唔系报道中分居及离婚，要多啲包容囉，我年纪都唔细，仲打打杀杀会好攰，退一步海阔天空。」𠵱家林利有好多妙法解决婚姻危机：「我会用温和嘅方式处理，两公婆嘈交时，我咪离家等佢落啖气先；佢去K场饮酒饮天光，𠵱家我唔会叫佢饮少啲，愈叫愈反效果…佢饮完返到嚟我就扮瞓咗，千祈唔好讲嘢…」
赞老婆个底好但要教
林利承认老婆好似𡃁妹咁唔够成熟，而且直肠直肚，脾气又大：「我哋又唔系唔夹嘅，需要啲时间囉，佢又唔系成日『发作』，而且台湾啲女人嗲啲，以为闹完交嗲返就冇事，但其实个心仲有嘢，要慢慢释怀。」数完老婆缺点，林利即冧返佢：「佢个底系好老婆，唔系坏女仔，但要教，所以要珍惜佢，唉！我都几十岁处于半退休状态，之前咁辛苦跑江湖，病又病过，亲人(妈妈)又走咗，要对自己及家人好啲，我想要个伴，唔想孤独终老！除非有第3者就冇得救，但我哋又未行到呢步，暂时全部嘅嘢都可以处理到。」
为妻洗底裤做小男人
言下之意，问到夫妻相处之道系咪靠个「忍」字？林利认为用「教」字会比较贴切：「钟意一个人慢慢就唔会出声，要用爱嚟融化佢，我要带住佢行，因为佢长期畀有精神病嘅妈妈精神虐待，加上疫情下表演少咗，又要供楼同养阿妈，压力好大。」他又指自己系个好到不得了的老公，但求过啲简单生活唔介意做小男人，仲自爆唔会出夜街，会留喺屋企煮饭洗衫，甚至帮老婆洗埋底裤。至于被老婆投诉房事唔够，为咗满足老婆，他笑说：「𠵱家好啲，交到啲货！」他搞笑解释，因为牀上有好多货要寄，老婆亲自处理出货、入货，所以日日都要去交货：「房事问题要搞掂晒啲货先，只要唔吵吵闹闹慢慢就OK，最重要系家和万事兴。」最后林利强调，唔觉得自己受委屈及无用，坚称：「我不知几开心，几十岁人仲咁靓仔及有咁多Fans支持我。」