独家丨七师傅彩排被抱起凌空转圈吓到脚软 开《唱笑会》好辛苦以后唔再搞

七师傅(七仙羽)处女下海，将于本周(12及13日)在九展举行《师傅七都识唱笑会》，日前彩排期间，有份演出的庞景峰竟一手兜住七师傅大髀内侧，一手捉住师傅只手，然后将她身体挞上膊头，并急速转咗一圈，险象环生！七师傅明显受惊尖叫，MIRROR演唱会事故在前，七师傅即喊停话：「我好惊，呢个骚唔出得意外㗎！」采访：方骞平 摄影：罗安强
 

MIRROR前周四（7月28日）嘅第4场红馆演唱会发生严重意外，悬挂半空嘅巨型屏幕突然跌下，击中舞蹈员李启言（阿Mo）和张梓峯。MIRROR演唱会事故发生后两周，轮到七师傅开show，《头条娱乐》记者直击首天排戏情况，见七师傅边用餐边跟主办单位老板张颢霖(Henry)密斟，对个show所有细节位都要问得清清楚楚，不容有失。

开骚打「天才波」靠执生

当晚演员七师傅、钟雨璇、徐蒨宁、庞景峰、齐釨湮、符曦文、和泉素行齐集，对完戏，马上争取时间排练。剧情系讲唐七藏取经途中收服3只妖精，期间，庞景峰竟「孙悟空」上身好鬼high，更因应对白需要，他讲完一句：「师傅唔好介意。」就示意师傅起身，并一手兜住师傅双腿内侧位置，一手捉住师傅只手，将师傅挞上膊头，再好快咁转咗一圈，师傅喺毫无「预警」下吓到双脚乱踼兼失神大叫：「我好惊呀！唔好再转，转到晕喇…」见师傅落地时一度摇晃失重心，身体带点倾斜，故作镇定笑住合十。

惊魂甫定后，七师傅认真表示，演出时一定唔可以再转：「太惊太惊喇，万一跌咗落嚟就麻烦喇，呢个show唔出得意外㗎！」师傅又指虽然今次演出打「天才波」，但唱歌、跳舞加埋记对白都好辛苦，做完今次唔打算再搞：「今次当做慈善，除捐酬劳仲会布施快乐畀人。」

叫弟子彻夜为伤者唸经

提到MIRROR红馆演唱会严重事故，对师傅未有造成演出阴影：「局方反而会重新审视表演场地，举办演出活动嘅安全性，所以观众会睇得更加安心，更何况我又唔系开红馆Show，舞台会简单好多。」师傅亦唔担心会影响到将来演唱会嘅舞台设计及制作：「坦白讲，好多观众系嚟睇人，睇唱歌及跳舞，唔系嚟睇个台，只要有观众周围都系舞台，就算冇个台企喺街边唱都得，最紧要系安全。」

发生意外后，师傅叫晒弟子彻夜为伤者唸经：「我睇第一场MIRROR演唱会真系好精彩，佢哋用咗咁多时间嚟排，大家都唔想发生呢啲事情，暂时畀佢哋休息同埋消化吓。」七师傅跟ViuTV合作无间，她力撑不论台前幕后，甚至高层都好nice，大家有商有量，互相帮助，唔系外间所讲得咁负评，反而好有人情味。
 

星岛新闻集团庆回归25周年专题网站，请即浏览