头条戏场丨《壮志凌云：独行侠》100分的续集

对于相隔36年的续集评价，「好睇，真系好好睇。」麻烦有得拣请睇IMAX，由开场一分钟开始已经相当好J，澎湃又刺激嘅空战加飞行场面睇到好爽，其实将一套本身已经系神级嘅作品出续集已经唔容易，汤告鲁斯(Tom Cruise)做到，仲要做得好成功，认真恭喜晒。(刚上映) 撰文:廖思慧

戏中大量空战场面，包括教学班及真正任务，幕幕好睇到癫。

1986年的《壮志凌云》，只有汤告鲁斯一个人喺战机应付到拍摄，即系仲可以擘大眼讲到对白。今集就唔同嘞，汤告鲁斯为追求全实感，要求每位战机师演员都要在高空飞行的F-18战机内完成拍摄。所以众演员开机前都花咗5个月进行密集训练，以克服高速飞行的重力变化。如非必要都唔会用CG嘅汤告鲁斯讲过：「观众会睇到、感受到，你绝对假装不了。」

汤告鲁斯表演赛
外号「独行侠」的麦彼得（汤告鲁斯饰）临危受命，要返回自己出身的飞行学校担任教官，教一班精英点喺有限时间完成超艰巨任务，就系需要以低空极速穿梭迂回曲折的山谷之间，反应慢啲都会撞山。精英当中嘅「公鸡」毕伯利上尉（米尔斯泰勒饰），系已故战友「野鹅」嘅囝囝，麦彼得同佢及旧爱萍妮（珍妮花康纳莉饰）最有情感交流，一个有仇一个有爱，另外传承亦是本集主题重心。

「公鸡」飞行技术出众，但因为一件事好唔妥「独行侠」，对于仇人做教官周身唔聚财。

「公鸡」好受欢迎，呢幕又弹又唱令到「独行侠」好感怀，因为首歌有啲嘢囉。

Glen Powell饰「刽子手」，特训战机师之一，拥有极好驾驶技术，但为人招积又缺乏团队意识。

Jon Hamm饰「旋风」，海军中将，负责管理飞行学院，由不满「独行侠」到好佩服。

Monica Barbaro饰「凤凰」亦是特训战机师，全片最靓。

片长2小时17分钟，有回忆有致敬有感动亦有笑位，冇过份沉溺旧时，高潮位多到数唔到，片尾缅怀首集已逝导演Tony Scott竟然有啲眼湿。最后，59岁嘅汤告鲁斯仍然走得好快，要好好保育佢呀。

进行飞行拍摄时，演员要承受高达8倍重力，汤告鲁斯爆料指有演员辛苦到呕。

麦彼得同萍妮拍拖好好玩，又揸电单车又揸船仲飞埋上天。

更多新冠疫情资讯，请到以下专页浏览（按此）