头条独家丨黄庭锋闹汤洛雯系「魔鬼」 《OPM》首做男一为晒肌忍口

入行6年嘅黄庭锋是TVB力捧小生，除于新剧《双生陌生人》演的两个年轻版马德钟外，于myTV SUPER上架剧集《OPM》中更首当男一。庭锋坦言有机会就要瞓身搏到尽：「《OPM》系考牌作品，戏中有喊戏、笑戏、激动、内疚、甚至晒肌，面对好大挑战。」他还踼爆汤洛雯系「魔鬼」，经常请食嘢诱惑他，真系少啲意志力都唔掂！ 采访：方骞平 发型：Chris Cheng 化妆：Daphy Cheung 服装：Harrison Wong

黄庭锋连续有两套剧推出，《双生陌生人》中既要跳海又被车撞，好彩都「益」佢，跟罗毓仪有Kiss戏。庭锋讲返跳海镜头都一额汗，但演出时以专业角度行先唔识惊：「因为着住西装，跳落海湿咗水系有一定重量，而且现场有好多蠔壳，挣扎咗20分钟，度好晒位先敢落水；至于被车撞到飞起𠮶幕，不论企位及反应都要好准。」

废青变热血青年

至于新剧《OPM》讲述金融界狼人为金钱去到最尽，他由废青变身热血青年，更有情感爆发戏：「好彩对手汤洛雯系有力量演员；Ben Sir(欧阳伟豪)又搞笑，佢哋好快令我进入状态。由于有场戏要晒肌，拍摄期间姚宏远同我一齐互相鞭策做健身，不过，汤洛雯就变身『魔鬼』，一方面鼓励我哋加油，另一厢又成日请食外卖，仲引诱我话『一嚿半嚿唔会影响六嚿(腹肌)嘅！有时真系抵受唔住食咗先讲，不过做演员真系要好有定力，尤其男一更加要搏到尽。」黄庭锋冇谂过「上位」问题，最紧要角色有发挥，拍完《OPM》学到唔少金融知识，暂时人生最大投资系买楼做咗业主。

更多新冠疫情资讯，请到以下专页浏览(按此)