世界杯2022｜专家分析:巴西八强「大」跳森巴舞

巴西上仗对南韩精兵尽出，最紧要系尼马复出，佢可以话系球队进攻嘅催化剂。「森巴军团」上半场玩弄明显有疲态嘅「太极虎」出神入化，攻势组织行云流水，四个入波都非常高质，睇到艾尔赏心悦目。八强将会面对上届亚军克罗地亚，艾尔觉得巴西仍然比较上风。

无论尼马、云尼斯奥斯祖利亚、拉芬夏比洛尼等球员喺边路嘅盘球同爆破能力强，左右两边都开到弓，克罗地亚嘅闸位球员会非常吃力。至于上场有入波嘅李察利臣，今仗对住对面两个颇为硬净嘅中坚路夫云同加华度尔，应该无乜甜头。只不过，巴西进攻点够多，入球方面唔太担心。

克罗地亚上仗凭较好嘅心理质素，喺互射十二码阶段淘汰日本。自从上届欧国杯之后，艾尔觉得「格仔兵」更着重稳守突击，效果都唔错，近二十场赛事只输一场。事实上，龙门利华高域、中坚加华度尔、中场莫迪历同前线比列锡嘅表现稳定，球队比之前更稳扎稳打。不过，克罗地亚阵容平均年龄较大，后备球员实力亦一般，面对如日方中嘅巴西，相信系球队今届最难踢嘅一仗。

巴西前线够活力，兼有堤亚高施华同马昆奴斯哥利亚守住后防，前中后三线实力平均。讲埋门把握力，巴西亦较克罗地亚强，可能再大跳「森巴舞」庆祝入四强。

投注角度嚟讲，去到淘汰赛阶段，让球盘让得太多都系避之则吉。今场巴西让一球球半，上盘就唔系艾尔杯茶喇！直接谂全场入球大细「2.5」大，另外可以博下云尼斯奥斯「入球」嘅首发事项。　　—艾尔