钟嘉欣家中分娩 诞7磅细仔凑好字

文：娱乐组

有指陀第二胎的钟嘉欣已于上月底在加拿大诞下BB，但身边好姊妹一直守口如瓶。直至昨日，嘉欣终于正式宣布逾7磅的细仔「Jared Anthony」已出世，肥嘟嘟的BB既似爹哋又似姐姐Kelly，非常趣致。正坐月的嘉欣昨日谈及今胎在家中自然分娩的过程，虽然讲了3次好痛，但坦言是个令她有自主感觉的难忘方法，连几位好姊妹都大赞嘉欣勇敢！

钟嘉欣昨日于社交网宣布细仔「Jared Anthony Leung」出世，重7磅14安士，相中的Jared仔不但似爹哋般头发浓密，两父子更十足「饼印」一样。嘉欣留言：「To our Son, Jared Anthony Leung.Welcome to our family. We love you.」她亦Hashtag了「naturalhomebirth」，意即今胎在家中自然顺产。
「好似生咗龙凤胎」
嘉欣雀跃地分享细仔出世后的可爱照片，又录音向记者分享追到「好」字的喜悦，细诉今胎在家中自然分娩的难忘经历。仍在坐月中的嘉欣声线精神，难掩再做妈妈的快乐，她谓：「大家好！好开心今日同大家宣布，我啱啱生咗个仔，好健康，佢名叫Jared Anthony，都算系一个大B，出世有7磅14安士重，好多、好多头发，同埋好似好似家姐Kelly，全家讲笑话我好似生咗龙凤胎！因为Jared同Kelly真系好似样。」
令人惊讶的是嘉欣今胎选择在家分娩，她坦言好难忘：「今次生产好顺利，顺产，好痛、好痛、好痛！最特别选择喺屋企生，因为加拿大好支持Natural Delivery。我好感恩好幸运揾到一班好好嘅助产士，佢哋畀我好多Emotion Support，畀好多Personal competencies嘅技术、方法，令生B过程更安全，教我听自己Body去生BB。我觉得呢种方法好Empowering，所以选择呢个方法生，绝对系一个好难忘嘅经历，同个仔一齐、同我嘅Family一齐。」
继大女Kelly后再追到细仔Jared，凑成一个「好」字，嘉欣表示反而会放更多时间在囡囡身上，想顾及囡囡突然多了细佬的感受。她坦言：「而家我休养，要坐月，要照顾好个仔，同埋好紧要，要照顾家姐Kelly，因为呢个时间始终突然多咗个BB，要放番多啲时间喺Kelly身上令佢觉得OK，而家我忙紧呢样嘢。希望好快可以介绍仔仔畀大家识，好希望见到大家。大家都要Take Care，多谢所有朋友、观众、传媒支持同祝福，唔讲咁多住，我都要瞓觉，bye！」
「唔惊讶佢会咁做」
此外，嘉欣三位好姊妹齐齐为她开心，大赞她勇敢！王君馨表示：「Very very happy for her！觉得佢好勇敢同埋好伟大，可以喺屋企顺产生。嚟紧都好忙，希望下年可以抽时间去探佢。」
岑丽香回应：「好开心佢同大家分享咗，佢好叻呀！因为佢喺屋企生，当然有专业人士啦，我觉得佢好勇敢、好叻！呢段时间我相信佢一定好攰，所以我唔骚扰佢咁多，到时希望可以见识呢个好得意、好得意嘅BB，其实我觉得BB好似佢家姐，好Cute！好替佢哋开心而家有个好字，祝佢哋日日都好好，开开心心！」
苟芸慧则谓：「恭喜！戥好姊妹开心！BB同家姐好似样，相信大个一定靓仔。Linda好勇敢，唔惊讶佢会咁做。不过唔同人都要考虑年龄，最安全喺医院生。」

■钟嘉欣两公婆继大女Kelly后，再添一细仔。（资料图片）

■嘉欣细仔Jared似足爸爸。

■钟嘉欣在家中分娩，非常勇敢。

■一众好姊妹都替钟嘉欣开心。（资料图片）

■大女Kelly（左）出世时，跟初生Jared（右）好似样。