【星島後台直擊】相隔20年再踏多倫多舞台，Janice 衛蘭於上周六（21日）完成演出後即接受後台訪問，直言今次狀態「其實好乾」。

原來團隊於演出前一日先抵達當地，嚴重時差加上睡眠不足，令她上台前一度擔心表現未如理想：「本身食咗8小時嘅安眠藥，但最後只係瞓咗4個鐘，真係好緊張。」

幸好台下觀眾反應熱烈，令她大為感動：「見到大家咁開心，我都放心，希望我已經盡力喇！」

演出期間 Janice 更落台與歌迷握手，不過笑言想再行前一步時就被保安「攔住」：「其實我想行得再遠啲，但佢哋（保安）唔畀我。」

完成演出後，她透露將會繼續留喺多倫多兩日，並計劃到 Queen West 及市中心走走：「難得飛過嚟，都想見識下呢個地方。」

再次感謝當地歌迷20年來支持，Janice 表示期待下次再與多倫多觀眾見面。

延伸閱讀：

【星島專訪】迷失兩年半重新出發 衛蘭首辦多倫多個唱

T05