【星爷讲波 29】修夫基创历史吐乌气抵赞 英超市提早打烊撑国家队

距离2024欧国杯决赛只有三日，随住两支冠军战球队先后诞生，话题当然集中喺呢两支球队身上，昨天就讲咗西班牙16岁新人王耶马，今日就轮到几乎做得佢爷爷嘅英格兰统帅修夫基。

耶马之所以值得谈论，其中一个原因系佢破咗好多「最年轻乜乜」纪录，而修夫基最多人谈论嘅，当然系佢带领英格兰嘅表现。

英格兰虽然小组首名资格出线，16强、8强顺利过关，但批评佢嘅声音从未停过，其中最为人诟病系佢即使拥有英超、西甲和德甲最佳球员在阵，但整体表现差强人意，如果唔系三番四次关键时刻天降福将，可能早就执包袱回国。

但经过英格兰四强赛2-1挫荷兰入决赛之后，虽然又系险胜，但一向跟红顶白嘅舆论对佢嘅批评即时静晒，但都冇大赞修夫基表现，而系将视线转移到个别球员身上(接后文)。

星爷想讲番句公道说话，修夫基表现虽然未尽理想，但接手英军后立下不少汗马功劳，佢同耶马一样缔做咗好多前人做唔到嘅纪录，净系呢项「首位英格兰领队带领国家队连续两次杀入国际大赛冠军战」就前无古人啦，一个唔觉意赢埋冠军，就真系名流青史，就连英王查理斯三世、王储威廉都开腔表扬，前者更好幽默咁话：「我鼓励你们下场不要在最后阶段才入球﹑或踢到12码取胜，我相信全国人民的心率及血压都会大大减低。」咁到唔抵赞，系咪mean咗啲呀！

讲开抵赞嘅，除咗四强赢波功臣奥尼屈坚斯福至心灵嘅关键入波，仲有曼联小将高比马恩奴(上图左)，就连接二连三批评修夫基嘅英格兰名宿连尼加都忍唔住大赞，话佢系「十分出色的球员，他太不可思议了」。星爷十分同意连尼加睇法，高比马恩奴表现沉着、冷静，解决了修夫基中场嘅难题，前途和耶马一样光明。

最后不得不讲英格兰人对国家足球队嘅支持实在无得顶，为咗赠兴，英格兰最大连锁超市集团Tesco在决赛当天(星期日)有特别安排，决定让旗下全国约1800间便利门店，由一般晚上11:00关门改为7:30(开赛前半小时)，方便员工回家或去酒吧欣赏决赛直播，呢个惠民及支持国家队做法一样抵赞。

T100

【2024年欧国杯期间，加拿大《星岛网》每日都会有驻场「球评人星爷」为大家开坛讲波，仲揾埋AI帮手预测赛果，人机强强联手，肯定「近」到无伦！】