【黃庭桄專欄】網上拜山

有不少移民外國的朋友問我，他們可能十年八年都未必回港一次，清明或重陽時節，沒法去到已逝父母的香港墳前拜祭。孤墳荒草，香都冇支，該怎麼辦？

「有些網站，可以為先人製作一個悼念專頁，然後有不同虛擬化的拜祭物品，例如香、油雞、紅酒、香煙等，只需在照片上click一下，咁就拜咗山囉！」友人問，先人是否真的能夠收到？莫非連陰間都變得人工智能化？

其實用吓腦都知，假如打工仔返了一個月工後，老闆Click幾個虛擬Emoji公仔，便當做出糧，你會不會同佢死過？

如果我答他，在玄學角度，網上拜山當然是乜用都冇，這樣的答案，只會令他神傷，唔知點算好？

我唯有好言安慰，心誠，則靈。

除了網上裝香外，其實還可以抽空每日唸幾句聖號，例如唸二十一句「南無阿彌陀佛」，然後把功德迴向給先人，只花不用兩分鐘，何樂而不為？

其實每年的春秋二祭、盂蘭節和觀音誕，在香港有不少寺廟和道堂，都會舉辦法會，往往一連幾天。善信可以在法會購買附薦位，讓先靈入場聞經受法，享用祭品。

一般最平的位是二百元，豐儉由人。如果你身家疊水，當然可以買二千元的位，等先靈坐得舒服一些，就如紅館演唱會，握手位和山頂位的分別，但一樣可以聽到佛曲禪語。

我知道不少宗教場所都可以收支票、轉數快和PayMe，與時並進，即使人在外國，都可以越洋一盡孝思。

心中只要記掛著一個人，哪管人在天上或遠岸，情意都能山傳水遞地送到。