【黃庭桄專欄】改運

好友H向我呻到樹葉都落，說最近很當黑，屋企人先後輪住確診，自己去按摩時，又被技師扭傷手骹。看完跌打醫生後，泊在街邊的私家車被抄牌。加上股票投資失利，買六合彩連一個號碼都不中……

「好運滯啊！你有冇一啲改運方法可以打救我？」他猶如被一團黑氣包著成個人，烏雲蓋頂。

此時的他，方寸大亂，如果不幸遇上神棍，一定可以輕易騙取他十萬八萬元，或誘使他做幾場法事，或買一些趨吉避凶的開光聖物，多多錢都肯使，但求撥開雲霧見青天。

須知道，花無百日紅，每個人都一定經歷三衰六旺。旺時，不要有風駛盡𢃇；衰時，宜忍耐苦守，靜待曙光。先從心態著手，明白人生中有歡喜，難免亦常有淚。寵辱不驚，去留無意，閒看花開花落，一笑便已風雲過。

「我明！我知！人生道理聽過十萬次啦！你可唔可以入正題，醒兩招等我冇咁運滯呢？」好友H的耐性，活像黃色鴨子，要爆了。

「咁你快啲去剪頭髮啦！」一來可以讓自己有耳目一新的形象，亦寓意剪走衰氣。「如果可以，就食多啲齋，例如每個月的初一同十五，都戒殺生，以後最好唔食牛肉、深海魚、烏龜同蛇，因為牠們都是具靈性的生命。」

多行善積德，自然有助一個人行運。除了扶阿婆過馬路、買旗外，可以助印佛經、贊助建廟、捐棺材、助養貧窮小朋友、捐血等， 均是好人好事。

臨近觀音誕和盂蘭節，不妨去寺廟或佛堂報名法會，附薦給自己的冤親債主，超度已逝家人，陰安陽樂，改運神效絕對不可思議。