【曾智华专栏】马主：我都系儍吓儍吓

睇跑马，除真正每场赛事外，仍有好多嘢吸睛。例如学「零零亨」咁，不时住骑练有乜不寻常举动，有冇特别亲人专诚入场（尤其外地飞来），马主群人数多寡，是否男的执到正女的花枝招展……全部有显示也。

我又如何？最喜欢睇睇马主老友可有出现沙圈，因佢哋不少日理万机需要四围飞，若突然入场，也可能唔简单。

上周日第九场，突见到老友「马主L」拖住靓靓太太「斯文T」出现沙圈，与练马师吕健威吱吱㖊㖊。不过，望望电算机，死得，佢只「营造组装」由隔夜十二倍一路路冷，跌落二十七倍，即应该瓜得。

虽然只马闸前慢慢升到二十二倍，但睇返佢今季表现，真真弱过药煲，季初第一场前腿受伤退出；第二场输八个几马位，二十六倍；第三场更大剂，四十四倍，入直路后转弱。故此，今次二十几倍，摆明冇信心，加上短途排十档，我当然悭返。

点知开闸，哗，骑师希威森用抢钱式骑法，一嘢霸住第二位，不停放，放呀放，入直路都仍未断，正当人人以为佢最后一百米必脚软，将畀如飞杀上的大热门「河好运」擒下之际，哈，吹佢唔胀，竟能顶住赢马颈过终点。

一睇赔率，晕低，边个食晒？入闸二十二倍，开跑十倍？立即飞电「马主L」：「你系咪收埋食？」「碌Sir，食鬼食马咩，我都只系例飞，根本儍吓儍吓咋！」不过，赢马总是开心的，因执返几十万元奖金，帮补天价养马费也。

今晚赛事，我会再追「佛亮老挝」，上两次在艾道拿胯下大热倒灶，今次换潘顿，再唔汤唔水就攞去做狗饼。另加只「翘峯」，未跑过快活谷，博你唔信，执三档孭重磅，容天鹏要毕业，只只去！