【曾智华专栏】Blacklist佢？BB思维

专栏日日写，当然要揾题材。报业大旺时，有老友同一日用五个笔名孭七个专栏，真系人都癫，点搞？老江湖有一招叫「撩交打」！并非真的拳来脚往打到面肿出血，而是开打「笔战」：「阿碌，我冇嘢写时，就揾个专栏老友，就一个敏感话题扮闹交开笔战，加盐加醋七情上面，动晒真气咁出招。读者乃街边牛叔珠婶，天性八卦，最喜欢见街上MMA（综合格斗），咁就可以揸机狂拍低，即传畀老友，另一方面又大嗌——唔好打啦！『笔战』开打，正似如此！」

此乃几十年前流行做法，我当然唔试，因从来唔同人闹交打交，伤身伤气。写专栏？思潮源源不绝，从未干塘，点会咁老套扮同人闹交，博读者好奇睇？

所以，当前朝N咁多「好奇友」来讯息：「喂喂，青姐讲你呀！」我几大饮埋杯奶茶，叹埋件蛋治先睇。

哦……乜咁益我呀？赚硬稿费㖞。原来老友青姐乃小弟专栏及Facebook读者，犀利到连留言都睇埋（我大部分冇睇㗎），指出早前我论及湾仔某酒楼的「完美烧猪」，被留言大骂。我错我错，实在不应和盘托出大部分中式食肆的真像，正是水准飘忽不定。原因：一、大厨放假；二、周五六日忙到飞起；三、周三周日跑马；四、大厨交徒弟落镬。单以上四点，已足令出品水准下跌。

再者，任何食肆皆珍惜熟客，米饭班主也，故此有特别好嘢，当然预留。我食到一级猪，除避开以上四点外，更向酒楼声明畀多点钱，兼早一个半月预订，烦搜罗顶级材料。

老友，你想生兜兜撞入去，就有同一出品同一水平，若冇就Blacklist人哋？是否刚出世？