【曾智华专栏】民调公信力的真与假

立法会换届选举年底举行，各路人马纷纷摩拳擦掌铺路争櫈仔，故此未来半年会好戏连场，或明争，或阴斗，为权力，可能乜嘢核突招数都会使得出㗎。我会当戏咁睇，间中又会扮演「政治评论员」，到底接触香港各级选举，已凡四十年，好多明谋阴谋，见惯见熟也。

虽然如今香港已经「由治入兴」，全部自己人围内，统一鼻孔出气，应该会协商嘅，就算自己自私唔做，背后「大势力」都会做啦。

儍儍哋嘅，其实背后「大势力」早已对今届个别议员表现非常不满，早早放风要换马，咁即系有位空出畀各路「自己人英雄」争夺，势必打崩头，将会好刺激㗎。

例如，民主思路突然失惊无神抛个民意调查出嚟，话「结果」发现近半数受访市民不满立法会表现，仅有三成表示满意。

小弟一睇，几乎喷饭。点解？大佬呀，民主思路做调查，话市民唔满意现届立法会表现，即有如早年民建联与民主党打生打死，各自做民调，真真唔使问阿贵，出嚟结果当然有利自己，打残对方啦。

难道民建联调查会「发觉」民主党做得好咁戆居咩，当然，倒转亦唔会发生。

好嘞，如今民主思路摆明想下届再进军立法会，假若佢哋做的民调，话市民非常满意现届所有议员表现，咁仲使鬼佢哋咩。理所当然，民调结果力踩现届议员表现未符市民期望，正路。但民主思路召集人汤家骅又未免太过「明刀明枪」，竟公布民调后，透露党内有多位成员有意参选，咁咪即系露出马脚囉。

小弟读大学时，也读过民调研究。总之，无论结果点，第一要睇边个畀钱做，第二要睇调查问题点草拟，以上两点可全面「操控结果」㗎。