【曾智华专栏】唔该你申请啦

边个唔该边个？有乜嘢要申请？

真真世界轮流转，香港过去一百年，有两个身份，绝对吊起嚟卖，只怕人人嚟真打崩头，从来唔惊冇人吼。系乜？正是马主及马会会员！最「非常时期」，听讲「枱底价」是天文数字，当然此乃犯法，早有人因此去咗赤柱踎。

不过，时移世易，近几年香港不少有钱佬变咗「冇钱佬」，好唔掂，个别曾经是大马主。

另外，十万计香港「台柱」式专业壮年移咗民，呢班本来全属马会会员生力军。

要马照跑，单靠草根赌仔当然唔掂，一定要有马。马的身价如今百几万元到千几万元，有几多香港人买得起，再花八万、九万元一个月去养马呢？马会规定只有会员才可竞投养马权，连锁影响下去，若马会唔够会员，就唔够人做马主，咁落去，分分钟唔够马跑，点搞？

拆解方法：一、放宽会员限制。以前申请做会员，必须从遴选委员方面攞到张矜贵申请表，经几个全费会员推荐加面试，过五关斩六将，再付大笔费用，才可入会。

马会当然唔想搞Cheap晒会员形象，最新办法，「精选」资深又纪录良好全费会员，邀请佢哋提名子女入会，不需再向遴选委员「求」申请表。如此，好快可吸纳千计新会员。

二、新会员增多同时，放宽每个人及每个组别养马数量，鼓励多啲人夹份过马主瘾。

以上两招，在以前吊起嚟卖的日子，绝不可能出现，意即如今情况相当水深火热！

今晚第七场三班千二米，「线路盈乐」牌面高晒，不过，我喜欢「佛亮老挝」。上仗跑第二输个几位，睇佢入直路种斗心非比寻常，虽被前马顶住，但竟会在马丛中自动侧头，提骑师换线冲刺，不简单。今晚投一票W、P！