【曾智华专栏】马王竞争够刺激

季季都会选马王，今季特别刺激！因有三匹皆马王级，包括「遨游气泡」、「嘉应高升」及「浪漫勇士」。

三匹马各有千秋。

「遨游气泡」今季大熟大勇，跑五场四W一Q，赢三场国际一级赛，兼且场场皆Easy Win，三冠马王摆明囊中物，仍未知可以去到几深，睇嚟应该试做过江龙，与国际级马王比试一下，令自己成就更上一层楼。

「嘉应高升」仍四岁，但早已赢到冇对手，今季六次全Win，犀利到好似冇考验，摆明已是当今世上的短途王者。事实，在国际赛中也完全冇外队马够佢跑，近三场一级赛扫晒。究竟潜质去到边，也是未知。

以上两匹，唯一蚀章，是暂时今季未有海外赛绩，可以提升做「王中王」。

理所当然，暂时论成就，以上两匹仍差「浪漫勇士」一线，因今季有一场海外一级赛「美丹大赛」冠军垫底。而刚刚全球最高奖金的「安都拉兹」泥地赛事，也拼入亚军。但有一点令人忧虑，呢场最后一百米只马用得好尽，万一伤咗元气及英雄感，令斗心受挫，再出之时，难有以往的王者霸气。

真的有少少担心，因「浪漫勇士」今季七岁，系时候已经摸顶，只差几时回落。

英雄总会似太阳，会日落，请看看「加州星球」，但一日未再出，一日都未知。

假若仍继续横扫，当然马王系佢。否则，失多一场W的话，咁「遨游气泡」及「嘉应高升」即可乘势而起。

由现在到季尾，马王之争，将紧张刺激。

明日沙田又有大赛，四岁马跑香港经典杯，乃打吡预赛，正路考虑可能仍会冚手。