【曾智华专栏】点解你畀人呃？

新春饭局闲谈话题，最多人有兴趣：一、为乜咁多人做骗子；二、为乜咁多人被呃，乜咁多成年人咁蠢？

小弟开班教理财，有两重点要求学员日日记住，一为：唔好乱投资，甚至唔好投资，惟有如此，才能立于不败之地。第二，商业世界，骗子如麻，合法与非法的，瞩目皆是，个个以「赚」及骗你的钱为目标。

以上两条，主要希望你咪不停发白日梦，以为投资与赚钱有个等号。事实呢？十次有九次刚好相反，有冇咁蠢成日走去蚀本？分享过程中，我举出无数的实例。

至于骗子，其实由零开始已满布大家身边，化身成为乜嘢人都有，不少更有个合法身份，例如「投资顾问」，或乜乜物物「中介人」。总之，任何人埋你身，话好想益你、替你揾钱，又或提供揾钱机会，甚至献身与你合资做生意，一于全部兜脚伸佢哋走可也，绝少机会会踢错人！

全世界骗子点解咁多？因大有市场。点解市场咁大？人性囉。人性中的弱点，有不少永恒存在又畀晒位骗子入的，包括：贪婪、恐惧、无知、好色、寂寞……以及有一种，个别内地学生会中的，正是「身有屎」。

「身有屎」呢句广东俗语好核突，但胜在一矢中的，形容得极精准。

点解中招者咁惊「海关」、「公安」、「入境处」、「电讯管理局」……以正常推断，能来港读大学者，几乎肯定是内地尖子。点解尖子会咁冇常识，咁易受骗？

这又要问到，点解佢哋咁有钱，钱从何来？若由父母而来，父母巨富，又从何而来？一连串的问号后，顺藤摸瓜，就会知道佢哋点解连普通人都「不可能相信」的电话欺骗，竟然会信。但佢哋会愿意坦白相告原因吗？你话呢？