【曾智华专栏】你听咗姜涛新歌未？

哈哈哈，哈哈哈，笑死冇命赔。

近日马友碰口碰面，个个互相调笑，猛问：「你听咗姜涛新歌未？有冇唱出你心底的真正感觉啊？哈哈哈！」

起初小弟都唔知佢哋噏乜，因从来不是「姜糖」或「姜粉」，只欣赏佢乖乖仔的形象及充满奋斗精神，比同辈年轻人略优胜。

既然个个讲姜涛新歌，好，立即上网查。不查犹自可，一查真系笑爆嘴，唔怪得班马迷老友咁「心花怒放」，互相取笑喇。

因姜涛新歌名《白果》，最攞命的两句，绝对直插马迷心坎：一、「是我的心魔，怕吃白果」；二、「是我的心魔，爱吃白果」。

两句字面好矛盾，但这正正发生在大部分烂赌马迷身上……又怕食白果，但又不停主动个个星期争住食两次，唔「爱」又岂会如此？

讲马圈「大吉利是」嘢，另有两宗，一为马会设计个钟比潘顿敲，凡赢一场敲一吓，结果好多人认真又好，多口又好，形容此为马迷「丧钟」。因个个追佢破纪录，弊在纪录未破前，已输到瞓街，无他，人人以为「软硬鞭」真的会不顾一切早日达标。岂料……你话输咗几多日呢？

另一单畀马评人笑甩肺，为安排骑练扮大头佛。大头佛在广东俗语中代表乜，你话呢？难得又有华籍骑练肯扮，咁就要睇睇佢哋扮完之后的蛇年运程喇。

明日我最有兴趣研究二班千二米一场，睇牌面，并无一匹特别超班，理论上「华丽再胜」、「人和家兴」、「同祥和顺」、「魅力宝驹」及「水晶酒杯」皆有机会W，拣边只呢？

决定拣「水晶酒杯」，上次爆冷胜出，不少人认为六岁马，冇得冧庄咾啩？但翻查纪录，此马以往状态好时，多是打孖出击的，今次可能也如是观。