【曾智华专栏】潘顿够数．布文翻生

香港马圈乃澳洲帮天下，早是不争事实，若想拗，你肯定系新嚟嘅。班友真可以翻手为云，覆手为雨，吹胀马迷。

所以，唔理真真假假，场场估点开，反有更大乐趣，非马迷冇可能明白，因马迷与非马迷，处身两个不同境界。

两个月前马圈中开始有个流行讲法，正是一日「软硬鞭」未「毕业」（破韦达纪录），一日「哈囉文」都会玩梦游马场。几时会醒返回复真身？正是当潘顿望见「终点」之时。系真唔系真，事实已经话你知。

「软硬鞭」睇走势，明天将在大赛日大力敲马迷个「丧钟」，开晒香槟，喷埋烟花，在众星拱月中，破香港马坛纪录（此纪录，绝后机会极大），到时你喜唔喜欢佢，都应承认佢有超级骑功而恭喜一声，因呢个纪录绝对唔系「造」出嚟，而系「骑」出嚟的。

虽然大家心照，若佢场场嚟真，应该一季前已破纪录，只因条「软鞭」经常作怪啫。

好嘞，潘顿毕业，布文当然火速翻生嘞。老友，过去三个月，你有几何见过布文好似周三咁「布文」（即回复世界一级高手风范）的吖？W三场，另Q两场，全冇符碌，「真布文」返嚟喇。

从此，马迷可能有返条「扶手棍」，虽然澳洲帮仍会操控大局。

好嘞，咁毕业后的「软硬鞭」会点玩呢？此乃「哲学性」问题，大家齐齐估啦。

明日兴奋死，因有两场一级赛举行，我的矛头，系睇潘顿赢几多场，以便众星拱照佢破纪录，以佢老哥今时今日地位，要去马，肯定冇人会阻头阻势，事实也阻唔到。

明日潘顿只出七只，会赢：「嘉应高升」、「永远美丽」、「光年魅力」及「友爱心得」。一于W四只穿匀，等佢破纪录。