【曾智华专栏】咁玩法，问你点顶？

身边不少朋友，对内地一切，一贯坚持「另眼相看」，绝不肯回去，连有关内地的消息，也一概唔睇。这乃个人取向，无谓勉强。小弟虽然尊重老友的自由选择，但却不会如此，因世界不停变变变，我绝对有极强求知欲去睇睇睇。

故此，台湾当然频频去，内地呢，无论大湾区或北上，只要有卖点，必去。

但有几样仍未投入大潮流，就是北上睇医生、整牙及配眼镜。我虽然冇试，但却不停听到试过的老友兴奋地形容几鬼有「突破性」，真真走匀全世界都少见。

刚刚老友空姐N趁周末又联群结队杀上深圳，不停传讯息回来晒：「碌Sir，真真意想不到咁鬼正呀，你快啲嚟试啦，绝对是香港无法想像的体验啊。」

佢讲乜？乃是正在与几位娇滴滴空姐在深圳配眼镜。条片直播传来，哗，间店足足上万呎，成个眼镜城咁款，劲夸张。大堂中央设有大列新型按摩椅，你估玩边科？正是客人一到，就可随意坐在大班椅上按摩，边按边等验眼。验完就选眼镜框。然后，又再可挞落按摩椅等配镜片。一边等，一边又可走到饮品及小食吧，任饮任食，全部免费，舒舒服服按到入睡前，已一切搞掂走得，只收香港半价，问你服未？难怪空姐N不停V字手势咁款，笑骑骑话：「快啲嚟享受新体验啦。」死囉死囉，再下去，香港仲有乜消费行业可以撑得住？

一转眼，唉……又系「深圳有几好」讯息，今次到「Y姐」，传来一幅相，大大张按摩椅（内地真系个个咁需要按摩？），搞乜？

「碌Sir，刚刚在此洗个头，二十蚊人仔，足半小时，最好玩，全程摊在按摩椅上，双重享受，头与身体各部分齐齐放松，真系……」