【曾智华专栏】「去」与「不去」的表演

上周日赛马好好睇，不是因为小弟再符碌贴中「精算暴雪」，而是睇该日「骑师王」变化及第十场蔡神仙部署，安排「气势」变「冇气势」及「精算暴雪」突变「马王」级的工于心计。

先讲「骑师王」，绝对戏剧性，第一至第五场，讲都冇人敢信，开票赔率一百二十五倍的周俊乐竟胜出三场，远远弹离；此时，大热的潘顿，仅得两场第二；次热的麦道朗，则一W一第三，要追，好似难若登天噃。此时周俊乐赔率急跌，正常又合理。不过，小弟一睇，喂，乜麦道朗竟然唔多郁。即系点？即系幕后人有百分百信心佢会反胜。结果，「剧本」正是如此，老麦第七场开始，在两大澳洲同乡高手潘顿及布文「发软蹄」梦游马场下，连胜三场，成功变「骑师王」，保住天文数字的投注额。

当日「软硬鞭」潘顿又再玩软鞭，尤其是第十场输只「气势」最为恶睇。呢只大热马，次次出闸皆以天生速度先弹离对手，再轻松赢马的。呢场，奇！佢出闸竟唔汤唔水，畀内栏马顶住时冇发力，入直路只居中游。就此，厩侣「精算暴雪」可以好易咁跟佢屁股跑。神奇现象最后二百米上演，潘顿突然轻轻外斜，让出空档畀「精算暴雪」发力，一骑就有，早几场无大表现的马，突变「马王」，轻易弹离两个马位W出，骑者为本季「发霉之星」、呢场前仍未开斋的贺铭年！

蔡神仙回复马场魔术师真身，服未？

今晚快活谷跑十场，快活谷，人人都话方仔最劲，系真唔系真？错！廖康铭至系。必须留意佢两只：「经典时代」，高质新马，霍宏声早前专诚上从化试闸，一推胜出，勇锐！「发财鸿星」上次跑千八米，放到临尾才输少少，今次缩程，可以㓥人！