【曾智华专栏】77岁神奇女侠

人人会讲——生死有命，富贵由天，但真正有亲身体验的，又有几人？

上周到台湾金门旅行，就见证一个活生生例子，主角名珮珮姨。

珮珮姨今年七十七岁，身体健康，优雅大方，谈吐温文，肯定出身大家闺秀。外形睇，佢一切正正常常，但奇在每次午餐及晚餐前，就会失踪十分钟。当人人入晒席，差不多上头盘时，佢才悠悠闲闲地出现坐低，这就引起小弟好奇心。某次齐齐行去睇景点时，刚要揾话题，就问吓佢：「珮珮姨，点解次次饭餐前就唔见咗你，咁奇嘅呢？去咗边呀？」

「去咗打胰岛素针，入洗手间打，打在肚皮，早午晚餐前都要打，注射后五分钟开始生效，然后我就可正常进餐。」讲吓讲吓，佢进一步话：「碌Sir，我的境遇可能帮到好多人㗎，你可以公开畀大家知。我二十年前已生过两次Cancer，胰脏同胆都全部切去，但神奇地竟能够康复，行得走得食得，也可跟你哋去世界各地旅行，上高山落平原，其实过去二十年，每一天都系赚返嚟，所以非常感恩。」

哗……真真犀利，原来眼前呢位乃再生人，两次癌病，冇咗重要器官，仍然能够坚强面对，至今存活二十年，已经七十七岁，是否「神奇女侠」？

「不过，我可以生存下来，但我丈夫则……」珮珮姨唞大啖气继续讲：「真系生死有命，又系二十年前，佢本来好哋哋，经常打高尔夫球，有日与老友打完波，再打通宵麻雀，返屋企话有点唔舒服，于是我陪佢睇医生。医生建议做个身体检查，点知一查之下，大件事，发现肝癌，且已经到咗末期，冇得医，结果十二日后就魂归天国。」

珮珮姨与佢丈夫际遇，是否「生死有命」的最佳例子？