【曾智华专栏】佢真系病？

连病都畀人怀疑，证明你平时的公信力有「几高」嘞。讲边个？当然系「软硬鞭」潘顿啦！

过去两日，马友碰头都在热烈讨论马圈三个病人——潘顿、潘明辉及容天鹏。

点解热烈讨论？因……冇乜人信潘顿真系「病」囉。事实，佢周一早上仍嘭嘭声龙精虎猛试闸，跟手就话感冒告假，周三唔跑。周三跑泥地，冇大赛，奖金奀猪，呢位「富豪」高手选当日「病」，唔出奇，对老潘来讲，损失的奖金湿湿碎也。

结果易配七只，跑出两W两Q，另两只也有奖金。翌日报章形容潘顿「损失惨重」，只有佢先知系咪。不过，佢都要反问自己，点解咁多人唔信佢有病。

至于「细潘」潘明辉，完全冇人怀疑佢诈病。因赢完第二场「星云浩腾」之后，死挨到第五场后才宣布顶唔顺，余下三匹马易配。惨！结果一W一P一第四，全有奖金，对华人骑师来讲，咁先算「损失惨重」！

至于容天鹏，不单冇人会怀疑佢是否真病，反之，个个替佢打气，因知老容个病唔简单。幸而近日复见出现，松一口气。周三所见更丰满咗，证明开始吸收营养，好现象。大家更替佢高兴为有马赢，「逆市奇爸」胜出，给予容氏一家好大鼓舞也。

讲到诈病，小弟多年公务员生涯亦目睹不少。只要你话头晕肚痛，个个医生都愿写一日至三日病假纸（因佢唔写而你出事，要孭镬）。少部分害群之马攞咗病假，一转身就上咗东莞。点解我知？因部门阿头系我老友，佢一嘢就查到称病下属有出入境纪录，断正！

明日又跑马，「神仙蔡」近期现真身，今次出「气势」，肯定是过关缆趸，记住留意埋「健康快车」及「铁金刚」，另「精算暴雪」及「魅力星」也不可忽略。