【曾智华专栏】哈女病惨过我病

养宠物与养BB皆一样，真系要日日祈祷加阿弥陀佛，千祈咪病。因为成年人病，自己会照顾自己，但宠物及BB又细又弱，真系担心死。不过，既然是责任，就要孭！

家中小狗哈女，一向活泼冇大病，间中小问题也会一两日冇事，回复精灵跳蹦。

不过，三日前突然不停怪怪地呻吟，间中又用肚拖地行，然后久不久呕出白沫。咁情况，当然全家大细担心死。本希望佢以天然免疫力抵抗，但一日如是，两日如是，当然要睇兽医。

去第一间，似妹妹仔的医生指：「要照照X光，睇睇肠胃之内有乜，才可诊断，看看是否要做手术！」

X光完毕，医生话肠内有两个影，X光无法判定系乜。「为安全，我写纸畀你到设备齐全的中心，做个急症CT Scan啦，好唔好？」

边有得话唔好？第一阶段，先找数一千一百几元。

速速抱哈女到附近「高级兽医中心」。医生初步诊断，先比心理准备：「建议CT Scan之外，再验血睇色素及肝肾功能，连麻醉及医生费等，需要约一万二千元，做唔做呢？」

我望望老婆大人，老婆大人望望我，又系，边有得话唔做？吸啖气——做！

坐在候诊大堂等呀等，冷气冻到飞起，又唔知哈女其实乜事，真真但愿我呕唔系佢呕。

终于诊症室门打开，护士请入。

鬼佬医生解释得非常详细：「发现唔到乜嘢大问题，冇发现肠胃之内有何异物。故此，先打止呕针，再配发炎药物。另外，短期建议改食防止胃气胀的软料狗粮，再观察！」

狗粮足够食四日，盛惠三百一十元。另外「养和医院」式各类医疗收费，一万二千元。

即用咗一万三千几元替哈女止呕。人？求求其其队「喇叭牌」或保济丸可能已经掂！