【曾智华专栏】告仔魔法令人O嘴

赛马很好玩，好玩在你永远唔知下一步开乜！既然唔知，就会有一种兴奋的期待感。

当然，「开呀」之后，你可能会欢喜若狂，也可能会无限沮丧，但冇问题，两种感觉都很「过瘾」。

周三马神发威，一棍藕落我个头！因当日在本栏牙擦擦，话自己衰鬼大翻身，上周日贴士中到开巷，点知……一啖沙糖一啖Z，周三立即贴士食白果，打回原形变灯神，死未！

周三小弟被打回原形啫，但却有一位老牌练马师突然揭竿而起噃，正是告东尼。

告仔在周三前，练马师榜名列第九，中游，以佢名气咁大，冇理由如此，加上上周日输咗只马王「加州星球」，立即被多口佬揶揄佢练马方法有点老化，搞到马王跑成一箸菜咁，毫无竞争力，应早退休。

哈，话音未完，告仔却突然周三晚似变魔术，出六场，扫下四W六Q，全部冇东厩马冇钱收，令全场O嘴。

更令佢足以串串贡，为四W皆冇用潘顿、麦道朗或布文呢类高手，只用自己徒弟仔蔡明绍及钟易礼，再加一个中游骑师艾道拿，就咁已横扫快活谷，点到你唔服？更甚，四场W有三场爆冷，两只为三十四倍及二十六倍，简直神乎奇技，你班友话佢「廉颇老矣」？

同一晚，新晋巨星游达荣全面哑火，两只新胜马「焦点」及「竞骏皇者」再出走晒样。呢点，大家必须存记。

明天举行老牌杯赛「其士杯」，睇牌面应是新胜犹勇大幅加分的「坚又威」及「遨游武士」摆擂台。

但我会扒冷，呢轮告仔咁旺，一于买佢明天再出魔法，将「亚机拉」推到高峰。此马在沙田跑过一次千六米，即入Q，经过半年再突然报此程，告仔必有见地，我投一票。