【曾智华专栏】丑甩耳仔送烧酒

至于传媒及市民，更加「驯」晒，以前做高官，似日日步入黑洞，因唔知下步会有乜嘢发生也。

「咁系好定唔好呢？」我真诚一问。吓，竟然个个默然，冇人再发声。

等小弟讲啦，无无谓谓的Haters式挑剔，当然有破坏冇建设啦，但为香港大利益的提醒、批评，甚至监察，实在极之有需要。

远的唔讲，单讲讲夏宝龙主任的重要指示——无处不旅游，以及不停强调，一定要搞好香港「三港」（海陆空），方便发展经济，方便吸纳游客。

而特首也日日鼓励香港市民，无论走到世界哪一个角落，都要「说好香港故事」。

夏主任及特首动机正确又良好，见到佢哋摆明上心上脑希望香港好。但讲完大方向，难道两位自己落手落脚去前线做？

当然系一层一层由上而下（本来最理想是由下而上，层层自发，唔使大老板指示的），特首司长局长处长专员……齐心协力。

但香港市民见到的现象，又系点？

真真令人气馁，单讲个邮轮码头，已经有如童谣——丑丑丑，丑甩耳仔送烧酒。两年之内，一而再，再而三接驳交通搞到一镬泡，个个游客落船后即变「孤魂」，上周又嚟，一宗小事都搞极唔掂，游客点会「唱好香港」？

大家都知我好讨厌特朗普，但佢有一绝招，小弟举脚支持，正是永远不拖泥带水，遇到无能庸碌下属，必立即当机立断——You Are Fired！