【曾智华专栏】「软硬鞭」今季输马代表作

经常听见马迷谷气到爆，点解？因又见到顶级高手「软硬鞭」潘顿核突到爆式输马。事实，当佢表演极级骑功赢马时，你无法唔拍烂手掌，但倒转明目张胆输瓜顶头大热时呢，你几难唔㷫到讲粗口！

小弟又如何？越来越觉得呢丁「马场艺术家」充满娱乐性，当人人大大声嗌「哗哗咁都得？」时，我永远会心微笑，当谐剧睇。相信与我同一心态的，还有一众《赛马日在线》主持，尤其黄以文老总。

刚刚周三，潘顿又再「表演」输马。第三场跑千二米，罗厩「线路达飞」成顶头大热，独赢赔率不足三倍。

开闸！哈哈，所有资深马迷都心领神会佢呢场玩「唔去」，又窒又抽又软鞭，入到直路明知大势已去，肯定冇机会先轻轻扫两鞭，跑第六，输个几马位。

过终点时，黄以文以幽默语气指出：「呢场乃今季潘顿顶级示范代表作。」

哈哈哈，当然在讲反话啦，只揶揄呢位高手点样视竞赛小组如无物啫。最过瘾，旁边有位主持也接口：「系呢，哈，点解佢永远瞄住其他马箩柚嚟跑嘅呢？」

唔顶住前面马屁股，点可以有借口跑跑吓话前面马窒步，逼住我要抽？

「软鞭」出完，潘顿第六场即以「硬鞭」现真身，同是罗厩新马，佢一出闸，你就知今次想赢喇。先霸靓位顶住其他对手，入直路，更连环车轮鞭，打到只马开花，险胜短头，表现一百分。

同一个潘顿，同一晚演出，两个极端，简直香港马场任纵横。鬼咩，所有实力新马，全落佢手中，人人买佢怕。明日必须留意佢两只短途新马，练马师早卜定佢骑，分别为「盈妍威枫」及「勤德俱备」，皆明日之星，佢霸住，肯定有料到。有运执到靓档，我一于WP过关。