【曾智华专栏】今早圣若瑟堂必爆满

今日标题，为小弟实牙实齿预测，虽则圣若瑟堂唔细，坐满超过五百人，但必爆！

点解必爆？正因今早是人人（当然未必百分百）敬佩的前高官「孙公」孙明扬，举行安息弥撒。

小弟打咗三十多年政府工，又是传媒前线人，当然曾与不少顶级高官交往。高官圈，就是个社会缩影，千奇百怪人都有。

其实能坐到上高官位的（尤其大AO），当然个个身怀不同绝技。基于早年只有精英中的精英才有机会做AO，若经此梯阶上到处长司级位的，多信心爆棚，心高气傲，睇啲「渣人」（佢哋眼中的水皮友）唔起。

高官各具性格，个别甚为火爆，可以当众M到下属飞起，绝对冇面畀（因睇死你唔会辞职，兼升职与否操控我手）。有啲更习惯开会「掟File」，即将你畀佢的报告掟落地，甚至掟出会议室，相当具侮辱性。今时今日，呢类情况当然绝无仅有（系啩？），但上世纪六、七、八十年代闲过立秋！

早年的大AO，有两位特别得到下属敬重，因佢哋知道乜叫「尊重别人」，正是陈祖泽（John）与孙明扬（Michael）。John足智多谋，乜都睇通睇透，见到下属做错嘢、行歪路，只会加以提点，帮助开窍，从未听过佢以「侮辱式」教训任何人。

Michael又如何？也对时局世情了如指掌，经常气定神闲微微笑，且公关工夫极佳，几乎所有大小团体宴会都畀足面出席，且必有贴地话题。其中之一为讲跑马，真㗎，上世纪八十年代我访问佢，就正正用跑马来融冰，令节目更轻松。

「曾先生，其实跑马好易赢，我也有一条必胜方程式。不过，现今工作繁重，冇时间落实，退休先啦。」

退休？退咗十几年喇，从未出现马场㖞？静静喺屋企赢？