【曾智华专栏】你叫我点同情你呢？

以前在不同办公地方，经常听见阿A窒阿B：「做咩呀？博同情咩，吓？」

系咪难听过粗口？绝对系。但又绝对赤裸裸讲出办公室的现实——冇得博同情！若你欠表现，交不出成绩，绝对冇人会同情你，因再下去，除咗你被淘汰，更可能令成队人被你累到揽炒！故此，冇人会畀超过正常的时间与空间你去进步。

今日我讲边个？正是两年前以新西兰冠军练马师荣誉来香港的黎昭升。

来港前，单单睇佢的辉煌战绩，已显示好打得，属神童级，因26岁已成冠军练马师，赢尽当地无数大赛，亦曾经一季胜出一百六十场头马，刷新新西兰历来纪录，要几威有几威。

年纪轻轻而有如此亮丽CV，马会当然希望罗致来港大展拳脚，协助提升本地赛事水平。

初来港时，大量马主慕名将马拉往黎厩，而佢亦曾经以养马费收得最贵被「传颂一时」。

第一季胜出三十五场头马，成绩中等，但冇人会苛求。去到第二季，成绩滑落到三十一场，开始有声音揶揄佢「货不对办」，令黎昭升大受打击，似乎有点意志消沉。

好啦，踏入今季，有点大镬。因部分马主已冇耐性，开始将马拉仓。更弊，发生两件事，第一宗为「魔术控制」，在黎厩一战输五个多马位，一转巫厩，首次亮相即轻风送爽按缰胜出。

第二宗上周日发生，「爱心神驹」在黎厩N次食白果，一转廖厩，即可如飞杀上W出，爆近十四倍冷门。

你话嘞，若你系黎厩马主，会点谂点做？

今晚跑泥地，冇乜好玩仍要玩，独捧阿妹黄宝妮五班的「帝豪欢星」，上月尾第一次跑泥地短途，几乎爆出。今次可减十磅，细W大P可也。